Ці здолее сталічнае “Дынама” зноў наблізіцца да БАТЭ ўсяго на адзін крок? Даведаемся сёння бліжэй да 22 гадзін. Сталічны клуб згуляе сёння супраць футбольнага клуба “Мінск”, а барысаўчане сустрэнуцца з “Белшынай”. У вас яшчэ ёсць час паспець на трыбуны стадыёнаў. А вось пра подзвігі каманд у Еўракубках і першы хатні матч хакейнага “Дынама” дома раскажа Станіслаў Ліпскі. Рубрыка “Матчбол” працягне выпуск.
Вялікі хакей вяртаецца ў сталіцу. Мінскае “Дынама” першы хатні матч у восьмым сезоне КХЛ праводзіла напярэдадні, аднаклубнікаў з Рыгі прымалі "зубры". Пасля двух пройгрышаў “Спартаку” і СКА, нарэшце, вельмі хацелася ўбачыць вікторыю мінчан, тым больш на фоне скандалу з прызнаннем беларусаў легіянерамі ў Лізе.
Аднак нават закінуць шайбу ў вароты латвійскіх хакеістаў мінчане так і не здолелі, бела-блакітныя саступілі 0:4.
Так, тры матчы ў сезоне "зубры" прайгралі, аднак ці падстава гэта для расчаравання. Зразумела, не! На старце папярэдняга самага паспяховага сезона беларусаў у КХЛ сталічныя таксама саступілі СКА і таксама “Рызе”, а ў выніку, памятаеце, усё было добра.
Нягледзячы на ўсе праблемы, з якімі сутыкнулася мінскае “Дынама”, зараз падтырмка камандзе патрэбна як ніколі, вельмі добра, што прыхільнікі "зуброў" гэта разумеюць. Наступны хатні матч адбудзецца 8 верасня супраць “Трактара”.
І я не магу не ўзгадаць бліскучае выступленне белорускіх футбольных флагманаў у Еўракубках. БАТЭ пяты раз у сваёй гісторыі згуляе ў групе Лігі чэмпіёнаў, а “Дынама” другі раз заваёўвала права стаць удзельнікам асноўнага раўнда Лігі Еўропы.
У нашу краіну зноў прыдзе “Барселона” з Леанэлем Месі, італьянская “Рома” і “Баер” з Леверкузена. Менавіта гэтыя каманды згуляюць у адным квартэце разам з барысаўчанамі. Першы паядынак жоўта-сінія правядуць у гасцях 16 верасня супраць “Баера”, іспанскі клуб прыдзе ў Барысаў 20 кастрычніка. Дададзім, ужо ў гэтым сезоне БАТЭ зарабіў у Лізе чэмпіёнаў амаль 15 мільёнаў еўра.
А вось бела-блакітныя ў сваю кішэнь пакуль што паклалі толькі два з паловай мільёны, аднак у выніку паспяховага выступлення ў групе мінчане лічбу могуць падвоіць. У квартэце з дынамаўцамі – “Вікторыя” з Чэхіі, “Вільярыял” з Іспаніі і аўстрыйскі “Рапід”. Першая гульня пройдзе на выездзе 17 верасня супраць “Вікторыі”.
На гэтым тыдні стартуе чэмпіянат краіны па хакеі. Ужо ў чацвер суперматч “Шахцёр” – “Юнацтва”, у сераду сталічнае “Дынама” згуляе супраць “Ёкерыта” ў Фінляндыі, а ў суботу разам падтрымліваем нацыянальную зборную краіны па футболе. Каманда Аляксандра Хацкевіча згуляе супраць Украіны. Усе гэта, зразумела, на тэлеканалах Белтэлерадыёкампаніі. Любіце спорт і яшчэ ўбачымся.