Сапраўдны запал разгарэўся сёння падчас спаборніцтваў біятланістаў у змяшанай эстафеце. Драматычная барацьба разгарнулася ў шасцёрцы лідараў - Францыя, Нарвегія, Італія, Германія, Фінляндыя і Беларусь. Так, наша зборная сёння парадавала сваіх балельшчыкаў. На коне было нават трэцяе прызавое месца. Надзея Скардзіна, Дар'я Домрачава, Сяргей Бачарнікаў і Уладзімір Чапелін. Насуперак скептыкам яны прадэманстравалі добрую беларускую школу біятлона. Па выніку - высокае пятае месца. Чым яшчэ запомніўся гэты алімпійскі аўторак, раскажа Станіслаў Ліпскі.
6 красавіка 2011 года змяшаная эстафета афіцыйна была ўключана ў праграму Алімпійскіх гульняў. Г. зн. сёння ўсяго толькі другі раз адбылася такая гонка ў рамках Алімпіяды. У Сочы беларусы былі дзясятымі, у Пхёнчхане пятае. Падняцца вышэй зборнай сёння не дазволіла хуткасць.
Дзве Вольгі прыехалі з Мінска на Гульні ў Паўднёвую Карэю выключна дзякуючы перамозе ў рэкламнай гульні, арганізаванай афіцыйным спонсарам Алімпіяды. Тур не ўключаў наведванне біятлоннага стадыёна, аднак прапусціць выступленне беларусаў яны не маглі - у Беларусі купілі білеты на змяшаную эстафету і дабраліся да арэны.
Надзея Скардзіна перад стартам сканцэнтраваная. Беларускіх балельшчыкаў чуе, але пакуль адцягваць увагу не можа.
Стартавы этап Скардзіна адпрацавала чыста, эстафету Дар'і Домрачавай Надзея перадала восьмай з адставаннем 27 секунд ад лідара - італьянак.
Даша адпрацавала выдатна, выкарыстаўшы ўсяго адзін дадатковы патрон на сваім этапе. А дзякуючы высокай хуткасці сярэбраная прызёрка Гульняў у Пхёнчхане перамясціла Беларусь на трэцяе месца.
А вось далей прыемна здзівілі мужчыны: Сяргей Бачарнікаў пасля свайго другога агнявога рубяжа на апошні круг ішоў трэцім - ён абараняў наша трэцяе месца больш зацята, чым меркавалі скептыкі. Але Дысцью і Іаханес Бё сёння ўсё ж хутчэй. Бачарнікаў на фінішы пяты. Уладзімір Чапелін, дарэчы, адзіны, хто выступаў у гэтым відзе праграмы ў Сочы і здолеў на гэтай жа пазіцыі і скончыць гонку. Усяго 3 дадатковыя патроны выкарыстала зборная на чатырох этапах, лепш ніхто не страляў. Такі ж паказчык у фінаў, яны, дарэчы шостыя.
Перамагла Францыя. Гэтае золата стала трэцім для Мартэна Фуркада ў Пхёнчхане. Другое месца ў Нарвегіі, трэція італьянцы.
Выступленне беларусаў сёння адназначна натхніла, у чацвер чакаем эстафету жаночую. Дарэчы, Дынара Алімбекава пакуль у складзе на гонку. Надзея Пісарава па-за заяўкай.
А гэта ўжо турнір бабслеістак. Шматпакутная каманда Ямайкі ўсё ж здолела выйсці на старт, яркая зборная тут у цэнтры ўвагі. З-за рознагалоссяў Федэрацыі саннага спорту гэтай краіны і галоўнага трэнера каманды дзяўчаты пазбавіліся боба, на якім павінны былі выступаць. Добра, што ў самы апошні момант знайшоўся спонсар і новы спартыўны інвентар быў знойдзены.
У Ямайкі на зімовых Гульнях толькі адна задача - удзел. 18-е месца з 20-ці ў прынцыпе не правал.
А вось нападаючага зборнай Славеніі па хакеі Жыгу Егліча сёння і зусім выгналі з алімпійскай вёскі - допінг-тэст паказаў станоўчы вынік. Расследаванне справы прадоўжыцца пасля Гульняў.
Дарэчы, славенцы сёння следам за сваім форвардам развіталіся з Алімпіядай, саступіўшы ў 1/8 Нарвегіі ў авертайме 1:2. Зборная ЗША разграміла Славакію 5:1. Фінляндыя мацнейшая за Паўднёвую Карэю - 4:2. Швейцарыя саступіла Германіі 1:2. Чвэрцьфіналы ў хакейным турніры прадоўжацца ўжо заўтра. Мы ж чакаем жаночую эстафету ў чацвер.
