Cёння, роўна за 25 дзён да старту ІІ Еўрапейскіх гульняў, мы запускаем новы праект. "Зборная Беларусі". Гэта 18 серый аб нашых нацыянальных камандах, якія рыхтуюцца да мультыспартыўнага форуму. Галоўныя надзеі і тонкасці відаў спорту. Ад балельшчыкаў не выслізне ні адзін цікавы факт. Партнёр праекта "БПС-Ашчадбанк". Першая серыя праекта "Зборная Беларусі" прысвечана веласпорту. Чаму пасля гонкі спартсмены не могуць спыніцца і круцяць педалі яшчэ і на станку? Якія асаблівасці шашэйнага маршруту? І чаму мэдзісан можна назваць інтэлектуальнай дысцыплінай?
Усе адказы - ужо зараз! Такога яшчэ не было. Медалі ў веласпорце на трэку на І Еўрапейскіх гульнях у Баку не разгульваліся. А менавіта ў гэтым відзе спорту спартсменам трэба будзе пазмагацца за максімальную колькасць узнагарод - на коне 20 камплектаў золата-серабра-бронзы і 316 прэтэндэнтаў на іх. Так што на трэку ў канцы чэрвеня будзе горача, і гэта не ў пераносным значэнні слова. Ядро трэка падчас спаборніцтваў падобна невялікаму пчалінаму вулею. Палова тэрыторыі падзеленая на разміначныя боксы. У кожнай каманды ён свой. Калі не едуць на веласіпедзе, то веласіпед нясуць на плячы. І перад кожнай гонкай дбайна правяраюць. Бо для таго, каб не дапусціць спартсмена на спаборніцтва, досыць аднаго лішняга плюс-мінус міліметра, да прыкладу, паміж воссю карэткі і сядлом.
На станках тут да і пасля гонкі. Прычым круцяць педалі, як да старту, так і пасля яго. Таццяна Шаракова - велагоншчыца з рэгаліямі і маладая мама. Для яе Еўрапейскія гульні стануць першым сур'ёзным стартам на трэку пасля двухгадовага перапынку. Чаго не скажаш пра аднаго з лідараў беларускага веласпорту Яўгена Каралька, або караля скрэтча, як далі мянушку яго балельшчыкі. На Еўрапейскіх гульнях у кампаніі Рамана Цішкова ён пазмагаецца за медалі і ў мэдзісане, а гэта ўжо алімпійская дысцыпліна. Усяго ж у складзе зборнай Беларусі на старты выйдуць 18 спартсменаў, у тым ліку 10 мужчын і 8 жанчын.
Прафесіяналы раяць: білеты на трэкавыя спаборніцтвы лепш за ўсё купляць на месцы, дзе лепш за ўсё бачная фінішная лінія - арыенцір - тая, што насупраць судзейскіх трыбун. Кошт білетаў вар'іруецца ад 7 да 30 рублёў.
У адрозненне ад трэкавых спаборніцтваў, веласпорт на шашы дэбютаваў яшчэ ў Баку. Прычым беларусам атрымалася выйграць два медалі і абодва залатыя. Алёна Амелюсік стала чэмпіёнкай Гульняў у групавой гонцы, а Васіль Кірыенка выйграў гонку з індывідуальным стартам. Нашы чэмпіёны гатовыя пазмагацца за медалі і ў Мінску. У поўным узбраенні да Еўрапейскіх гульняў падыходзяць і астатнія беларусы. Допуск да стартаў атрымалі 5 жанчын і 5 мужчын. Усяго ж на 4 камплекты ўзнагарод прэтэндуюць 226 спартсменаў.
А вось тут стоп. Арганізатары ІІ Еўрапейскіх гульняў прапанавалі спартсменам маршрут у стылі урбан. Усе гонкі на шашы пройдуць па цэнтральных вуліцах сталіцы. А вось ацаніць сам маршрут шматлікія ўдзельнікі ІІ Еўрапейскіх гульняў ужо змаглі. На тэставай гонцы "Гран-пры Мінска". Некалькі тэхнічных паваротаў, хуткасныя спускі і галоўная адметнасць – 250 метраў бруку ў пад’ём. Самы яркі ўчастак для балельшчыкаў. Дарэчы, білеты на велашашы для гледачоў каштуюць усяго 10 рублёў.
Жанчыны праедуць 120 кіламетраў - гэта 8 кругоў па 15 кіламетраў, мужчыны - на 60 кіламетраў больш. Не здзіўляйцеся, увесь гэты час за спартсменамі неадрыўна будуць ісці тэхнічкі або машыны суправаджэння.
Першымі з веласіпедыстаў медалі ІІ Еўрапейскіх гульняў разгуляюць шашэйнікі. У суботу-нядзелю вызначацца чэмпіёны ў групавых гонках, у аўторак, 25 чэрвеня, - у гонках з паасобным стартам. Трэкавікі забраніравалі за сабою чатыры дні.