Сёння Кіраўнік дзяржавы падпісаў указ аб стварэнні дырэкцыі другіх Еўрапейскіх гульняў, якія пройдуць у Беларусі ў 2019 годзе. Яе заснавальнікамі выступаюць НАК Беларусі, Мінскі гарвыканкам і Мінспорту. Дзейнасць дырэкцыі будзе забяспечвацца ў цесным узаемадзеянні з урадам і Рэспубліканскім арганізацыйным камітэтам па падрыхтоўцы і правядзенні Гульняў. Дарэчы, сёння ў Мінск упершыню прыбыла каардынацыйная камісія Еўрапейскіх алімпійскіх камітэтаў з мэтай арганізацыі падрыхтоўкі другіх Еўрапейскіх гульняў - 2019, якія ў кастрычніку мінулага года было вырашана аддаць нашай краіне. Паступова становяцца вядомыя нюансы спартыўнай праграмы, а таксама аб'екты, якія прымуць спаборніцтвы самага маштабнага нацыянальнага праекта для нашай краіны. Пакуль жа вядома тое, што 15 відаў спорту напэўна ўвойдуць у канчатковую праграму пасля падпісання кантракта, аднак у гэты спіс яшчэ могуць дадацца дзве пазіцыі. Андрэй Казлоў з апошнімі навінамі вакол Еўрапейскіх гульняў у Беларусі.
Менавіта з гэтай сустрэчы можна афіцыйна даць старт актыўнай падрыхтоўцы да правядзення ў Беларусі самага маштабнага нацыянальнага праекта - Еўрапейскіх гульняў, якія пройдуць у 2019 годзе.
Спірас Капралас, старшыня каардынацыйнай камісіі ЕАК па Еўрагульнях-2019 у г. Мінску: "Гэта наш першы такі візіт у Мінску, дзе мы ацэнім з групай экспертаў аб'екты Еўрагульняў, абмяркуем праграму спаборніцтваў і запусцім рабочы працэс падрыхтоўкі".
Гэты дзень для нашых гасцей атрымаўся звышнасычаным. Каардынацыйная камісія Еўрапейскіх алімпійскіх камітэтаў пасля сустрэчы ў НАК і знаёмства з новым віцэ-прэзідэнтам арганізацыі Андрэем Асташэвічам пабывала ў студэнцкай вёсцы, на стадыёне "Дынама", які будуецца, у Палацы спорту, на Palova Arena і ў футбольным манежы.
З аб'ектамі, якія прымуць Еўрапейскія гульні, гасцей беларускай сталіцы знаёміў саветнік Нацыянальнага алімпійскага камітэта Беларусі Георгій Катулін. Пазней ён зробіць вельмі цікавыя заявы.
Стральба з лука і цяжкая атлетыка могуць стаць гэтымі двума відамі спорту. Асабліва моцныя беларусы ў другім з іх. З Алімпійскіх гульняў у Рыа нашы атлеты Вадзім Стральцоў і Дар'я Навумава прывезлі два медалі.
Мінскі стадыён "Дынама" стане галоўным аб'ектам Еўрапейскіх гульняў у 2019 году. Акрамя непасрэдна правядзення спаборніцтваў, у тым ліку і па лёгкай атлетыцы, тут адбудзецца ўрачыстая цырымонія адкрыцця. Менавіта ў гэтыя моманты да Мінска будзе прыкавана ўвага ўсяго свету.
Тэлекарцінка цырымоніі адкрыцця з алімпійскага стадыёна ў Баку, дзе ў 2015 праходзілі першыя ў гісторыі Еўрапейскія гульні, біла шматлікія рэйтынгі.
Стадыён "Дынама", на думку экспертнай групы, пасля рэканструкцыі будзе не менш прывабным для гледача.
Златка Мацеша, намеснік старшыні каардынацыйнай камісіі ЕАК па Еўрагульнях-2019 у г. Мінску: "Я думаю, што ён будзе добры. Гэта жа быў вельмі стары стадыён. А зараз ён будзе самым камфортным. Думаю, што 20 тысяч месцаў - проста ідэальнае рашэнне. І для атлетыкі лёгкай і для футбола - стадыён заўсёды будзе поўным. У вас вельмі спартыўная краіна, пачынаючы ад хакея і заканчваючы гімнастыкай мастацкай і плаваннем. Вы павінны ганарыцца сваімі спартсменамі".
Іншыя падрабязнасці праграмы Еўрапейскіх гульняў стануць вядомыя пасля таго, калі будзе падпісаны кантракт. Гэта здарыцца ў Мінску з удзелам прэзідэнта ЕАК Кач’янчыча. Але ўжо зараз зразумела, што праграма Еўрапейскіх гульняў будзе насычанай, а Беларусь з усёй адказнасцю ўзялася за правядзенне такога маштабнага спаборніцтва.
