Сёння вырашылася і адна з галоўных спартыўных інтрыг лета. Некалькі гадзін таму Дар'я Домрачава аб’явіла аб завяршэнні кар'еры. Яна зрабіла выбар на карысць сваёй сям'і. Адна з лепшых біятланістак свету пасля нараджэння дачкі і вяртання ў вялікі спорт выдала незабыўны сезон. Кульмінацыяй стала выступленне на Алімпіядзе ў Пхёнчхане. Чатырохразовая алімпійская чэмпіёнка яшчэ нядаўна была ў Нарвегіі. Там яе муж Уле-Эйнар Б’ёрндален праводзіў сваю развітальную вечарынку.
Для аб'яўлення няпростага рашэння Дар'я Домрачава сёння сабрала прэс-канферэнцыю ў Мінску. Усе падрабязнасці ў Паўла Капуцкага.
Працягваць або не прафесійную кар'еру? Над гэтым пытаннем Дар'я Домрачава думала да апошняга. Надзея Скардзіна аб'яву зрабіла на тры тыдні раней у прамым эфіры "Беларусь 1". Калі ў нядзелю з'явілася навіна, што Домрачава збірае прэс-канферэнцыю, сумненняў у аматараў біятлона амаль не было.
Звычайна для аб'яўлення аб працягу кар'еры прэс-канферэнцыі не збіраюць. Дар'я заходзіць у залу, запоўненую прадстаўнікамі СМІ. Прэс-сакратар НАК Вікторыя Менанава агаворвае фармат, Домрачава з хваляваннем вымаўляе такія сумныя для беларускіх аматараў біятлона словы.
Дзмітрый Губерніеў не чакаў і навіну аб завяршэнні Дар'яй кар'еры апублікаваў у Instagram раней за афіцыйнае аб’яўленне.
Дзесьці на апошнім раду ў чорнай кепцы сціпла сядзіць васьміразовы алімпійскі чэмпіён. Уле-Эйнар Б’ёрндален прыняў бы любое рашэнне жонкі. І на сённяшняй прэс-канферэнцыі павінен быў проста быць побач.
Уле-Эйнар Б’ёрндален, васьміразовы алімпійскі чэмпіён:
"Зразумела, у Дар'і была магчымасць працягнуць кар'еру. Стаяў выбар паміж дачкой і спортам. І калі б яна выбрала кар'еру і прадоўжыла перамагаць, то для гэтага давялося б траціць вельмі шмат часу. А гэта значыць менш часу надаваць Ксеніі. І гэта магло б адбіцца на яе развіцці, выхаванні. Мы прынялі рашэнне, што сям'я больш важна".
У сярэдзіне чэрвеня Б’ёрндален праводзіў развітальную вечарынку ў Нарвегіі. Разам з жонкай выканаў рамантычны танец.
Кар'ера Дар'і Домрачавай - гэта выдатная гісторыя поспеху. Першы алімпійскі медаль яна выйграла ў 23 гады. Бронза індывідуалкі ў Ванкуверы толькі раскрыла скарбонку, якая праз 4 гады зазвінела. Тры залатыя ўзнагароды Сочы ўзрушылі спартыўны свет. На наступны год Вялікі хрустальны глобус. Потым ператамленне арганізма, манунклеоз і пропуск сезона. Затым яшчэ шчаслівыя моманты. Нараджэнне дачкі Ксеніі, замужжа. І фантастычнае вяртанне. Серабро ў мас-старце Пхёнчхана і эстафетнае золата.
З вялікага спорту Домрачава сыходзіць па-сапраўднаму вялікай. Усё найважнейшае яна выйграла. Чатыры алімпійскія залатыя ўзнагароды, сем медалёў чэмпіянатаў свету, 34 перамогі на этапах Кубка планеты. Гэта дзякуючы ёй біятлон стаў самым рэйтынгавым спортам на беларускім тэлебачанні, гэта яна ўлюбіла ў сябе ўсю краіну.
У канцы Дар'я разам з Уле-Эйнарам наразае торт усім удзельнікам прэс-канферэнцыі. Беларуска нарэшце адпачне ад шалёнага рытму, у якім жыве з 6-гадовага ўзросту. Пакуль сям'я жыве ў трох краінах: Аўстрыі, Нарвегіі і Беларусі. А калі Ксеніі прыйдзе час ісці ў школу, вырашаць, дзе асесці.
Домрачава яшчэ не вырашыла, чым будзе займацца далей. Згодна з беларускімі законамі, Дар'я да 1 кастрычніка 2019 можа быць у дэкрэтным водпуску. У канцы прэс-канферэнцыі, распавядаючы аб Гульнях у Паўднёвай Карэі, яна робіць агаворку.
Чатырохразовую алімпійскую ніхто не папраўляе. У лютым быў Пхёнчхан, а Пекін - гэта толькі праз чатыры гады. Крыху пазней лагічнае пытанне, можа, праз год або два перадумаеце?
Без Домрачавай і Скардзіна беларускі біятлон ніколі не будзе ранейшым. Падобна, на нейкі час пра медалі трэба забыць. Але гісторыя падказвае, што без спаду не бывае ўздыму.
