Пераможная навіна. Наша Арына Сабаленка - першая ракетка Беларусі - выйграла фінал турніру ў Кітаі на старце новага тэніснага сезона і заваявала трэці тытул у сваёй кар'еры!
З бліскучай перамогай Арыну і яе трэнера Дзмітрыя Турсунава павіншаваў Прэзідэнт Аляксандр Лукашэнка.
"Гэта выдатны вынік на старце сезона, добры падарунак беларускім балельшчыкам і прыхільнікам па ўсім свеце", - гаворыцца ў віншаванні. Кіраўнік дзяржавы пажадаў камандзе моцнага здароўя, поспеху і яркіх перамог у новым годзе.
Барацьба за трафей выдалася няпростай. Сабаленцы прыйшлося гуляць два матчы за дзень. Прычым паўфінал і фінал адбыліся з розніцай усяго ў пару гадзін. Такі расклад на турніры прадыктавала надвор'е: 3 студзеня ў Шэньчжэне ішоў дождж, і - як следства - прыйшлося пераносіць матчы. У выніку ў 1/2 Арына сустракалася з гаспадыняй кортаў - кітаянкай Ван Яфань. Наша спартсменка паказала высокі ўзровень тэніса, аддаўшы апанентцы ўсяго тры геймы - 6:2, 6:1.
У фінале беларускай тэнісістцы супрацьстаяла амерыканка Элісан Рыск. Першы сэт застаўся за суперніцай - 4:6. У другой партыі Арына з лікам 5:2 мела дзве магчымасці выйграць сэт, але справа ўсё ж дайшла да тай-брэйка. Тут Сабаленка паказала сапраўды сталёвы характар і сілу духу. У выніку ўпэўнены поспех - 7:2. У вырашальным сэце беларуска хутка павяла. Лік - 3:0, але амерыканка здавацца не збіралася, чапляючыся за кожны мяч. Вось толькі сёння мацнейшай усё ж была наша Арына - 6:3. Бліскучая перамога на турніры.
Пасля перамогі Арына надала ўвагу сваім фанатам. На турніры ў беларускі было шмат прыхільнікаў. Сабаленка рабіла фатаграфіі і сэлфі з балельшчыкамі, раздавала тэнісныя мячы з аўтографамі. А таксама звярнулася да фанатаў праз сацыяльныя сеткі.
Арына Сабаленка, 13-я ракетка свету:
"Усім прывітанне! Я толькі што выйграла свой трэці турнір серыі WTA. Гэты спаборніцкі тыдзень стаў для мяне неверагодным. Проста хачу сказаць усім вялікае дзякуй за падтрымку. Я вельмі шчаслівая!".
Такім чынам, Сабаленка выйграла трэці турнір серыі WTA у кар'еры. Арына зарабіла больш як 160 тысяч долараў і паклала ў сваю скарбонку 220 балаў. У абноўленым сусветным рэйтынгу беларуска паднімецца на 11 месца. Далей наша тэнісістка адправіцца ў Аўстралію. Першая сустрэча на турніры ў Сіднэі будзе з сёмай ракеткай планеты чэшкай Петрай Квітавай. Адзначым, спаборніцтвы ў Сіднэі з'яўляюцца апошняй праверкай сіл перад стартам першага ў сезоне турніру серыі Вялікага шлема - Адкрытага чэмпіянату Аўстраліі. Ён пройдзе ў Мельбурне з 14 па 27 студзеня.
