Пытанні адукацыі і падрыхтоўкі кіраўніцкіх кадраў узнімаліся сёння і на нарадзе ў Кіраўніка дзяржавы. Аляксандр Лукашэнка правёў сустрэчу з кіраўніцтвам Адміністрацыі Прэзідэнта. Так, беларускі лідар праанансаваў шэраг маштабных нарад, якія пройдуць у найбліжэйшы час. У прыватнасці, кропкі над "і" расставяць у пытаннях удасканалення сістэмы ЖКГ. У жніўні вернуцца да тэмы адукацыі і школьных падручнікаў, а ўвосень у шырокім коле адбудзецца сур'ёзная размова аб стане спраў у сельскай гаспадарцы. Акрамя таго, Кіраўнік дзяржавы прапанаваў раз у квартал праводзіць маштабныя нарады з прадстаўнікамі ўсёй вертыкалі ўлады для абмеркавання бягучых праблем. У шчыльны графік Прэзідэнта на найбліжэйшую перспектыву зазірнула Вольга Макей.
У гэтыя дні рабочы графік Прэзідэнта насычаны маштабнымі і важнымі падзеямі. Яшчэ нядаўна - паездка на Гомельшчыну. Кіраўнік дзяржавы асабіста дэталёва разбіраўся ў пытаннях развіцця тэрыторый, якія пацярпелі ад аварыі на Чарнобыльскай АЭС. Разам з тым, важныя знешнепалітычныя мерапрыемствы. Літаральна ўчора - глабальная сустрэча з міністрамі замежных спраў Цэнтральна-Еўрапейскай ініцыятывы. Наперадзе - міжнародныя перамовы і Вышэйшы Дзяржсавет Саюзнай дзяржавы. Нават сёння, нягледзячы на ўрачыстую сустрэчу з выпускнікамі, у графіку Прэзідэнта - абмеркаванне важных агульнадзяржаўных пытанняў.
І чыноўнікі, і журналісты, якія асвятляюць працу Прэзідэнта, прывыклі - якім бы насычаным ні быў графік Кіраўніка дзяржавы - цэнтральнае месца ў ім - самым актуальным тэмам, якія хвалююць беларусаў. Таму аб даручэннях, якія даваліся тым або іншым кіраўнікам, Кіраўнік дзяржавы абавязкова спытае. Напрыклад, пытанне, якое абмяркоўваецца, тарыфаў ЖКГ. Не выключана, што яны могуць знізіцца, але для гэтага трэба будзе папрацаваць з сабекоштам паслуг. Сёння сустракаючыся з кіраўніцтвам Адміністрацыі Прэзідэнта Аляксандр Лукашэнка анансуе маштабную нараду ў гэтай сферы. І нагадвае, задача аб удасканаленні ЖКГ стаіць у першую чаргу перад мэрам Мінска. Менавіта сталічны вопыт будзе прымяняцца ў цэлым па краіне.
Маштабная нарада чакае і сельскую гаспадарку. Сустрэцца і прааналізаваць праблемы галіны дамовіліся ў верасні, пасля таго, як з палёў будзе сабраны ўраджай. Але перад гэтым дэталёва абмяркуюць і сферу адукацыі. Пакуль школьнікі на канікулах - у кабінетах чыноўнікаў - сур'ёзная праца па ўдасканаленні праграм і падручнікаў. Якімі яны будуць, сёння таксама цікавіўся Прэзідэнт.
Гэтыя глабальныя агульнанацыянальныя тэмы Прэзідэнт прапаноўвае абмеркаваць у шырокім коле. Не толькі з галіновымі кіраўнікамі, але і з прыцягненнем спецыялістаў, тых, хто, як кажуць, працуе на месцах і аб праблемах сваёй сферы ведае знутры. Ёсць пытанні і для вузейшага абмеркавання, але не менш важныя. У іх рашэнні таксама прымае ўдзел Кіраўнік дзяржавы.
Напрыклад, разняволенне дзелавой ініцыятывы. Пасля лютаўскай нарады ў Прэзідэнта шматлікія нормы і правілы для тых, хто вядзе бізнес, значна перагледзелі. Пакет дакументаў па паляпшэнні ўмоў вынеслі на грамадскае абмеркаванне, яно сабрала каля трохсот прапаноў. Самыя слушныя ўлічаць у падрыхтоўцы выніковага дакумента. Яго прымуць на ўзроўні Прэзідэнта.
Палітыка, эканоміка, бяспека - тры кіты існавання і развіцця дзяржавы. За кожным кірункам у Прэзідэнта - асобны штаб: Адміністрацыя, Урад, Савет бяспекі. Аляксандр Лукашэнка прапаноўвае сустракацца часцей, і абмяркоўваць пытанні, якія ўзніклі, па кожным вектары. Прычым, гэтыя нарады павінны стаць пастаяннай практыкай і выразна замацавацца ў прэзідэнцкім графіку.
Вядома, галоўнае, на што Аляксандр Лукашэнка настройвае кіраўніцтва Адміністрацыі, ды і ў цэлым усіх кіраванцаў у краіне - быць бліжэй да людзей. Выязныя сустрэчы з калектывамі павінны быць часцей, а абмеркаванне праблем - дэталёвым. З кожным. Асабіста. І дапамагаць вырашаць нават самыя складаныя пытанні.
Праблемныя пытанні беларусаў, асобных галін эканомікі і, у цэлым, краіны немагчыма вырашыць без прафесіяналізму кіраванцаў. Іх падрыхтоўку сёння таксама абмяркоўвалі на нарадзе. Тут не адукацыйная манаполія, але цэнтральная роля - у Акадэміі кіравання. Менавіта туды павінны трапляць самыя перспектыўныя і ініцыятыўныя, каб ужо пасля, атрымаўшы дыплом, з веданнем справы і вопытам яны маглі прафесійна кіраваць калектывамі.
