Ад працаўладкавання да бюджэту на будучы год. У Палацы Незалежнасці сёння далі ацэнку працы эканомікі краіны.
Шырокі склад экспертаў з урада, Нацбанка, рэгіянальнай і сталічнай улады абмеркаваў ключавыя кірункі развіцця. У маштабе пяцігодкі зараз даводзіцца наганяць упушчанае. Пасля не самага ўдалага мінулага года, калі эканоміка ўпала на 6 %, удалося выраўнаваць сітуацыю і выйсці на рост паказчыкаў, у тым ліку асноўнага - ВУП. Таксама аднаўляюцца аб'ёмы экспарту і золатавалютных рэзерваў. На гэтым фоне эксперты не назіраюць росту даходаў насельніцтва. Гэта пытанне Кіраўнік дзяржавы адрасаваў удзельнікам размовы. Таксама Прэзідэнт нагадаў аб кантролі даручэнняў па сярэдняй зарплаце і працаўладкаванні. Колькасць занятых у эканоміцы краіны павінна расці. Адсюль і лагічныя пытанні да сферы фінансаў і інвестыцый.
Зарплаты і рабочыя месцы - адна з асноўных тэм размовы. Прэзідэнт адзначыў, што павысіць сярэдні ўзровень даходаў у краіне неабходна ў першую чаргу за кошт павелічэння памеру зарплаты тым катэгорыям грамадзян, у якіх яна была ніжэйшай за сярэдняе значэнне. Што тычыцца працаўладкавання, паводле звестак урада, за 9 месяцаў гэтага года ў краіне з'явілася 48 тысяч рабочых месцаў на зноў створаных прадпрыемствах. У той жа час да канца 2017 Саўмін арыентуецца на лічбу 70 тысяч.
