Гэта традыцыйнае мерапрыемства, якое ў нефармальнай атмасферы збірае людзей са свету культуры і мастацтва, спартсменаў, дзяржслужбоўцаў, прадстаўнікоў беларускіх сродкаў масавай інфармацыі. Усіх тых, хто дасягнуў у сваёй сферы дзейнасці вялікіх поспехаў. Як адзначыць Кіраўнік дзяржавы, гэта людзі, якіх аб'ядноўвае адна вялікая якасць - неабыякавасць. Многія з прысутных сёння атрымалі заслужаныя ўзнагароды. Сярод узнагароджаных і мае калегі. Прэзідэнт пажадаў усім поспехаў у новым годзе і надзейнага апірышча ў асобе родных і блізкіх, каб тыя паставіліся з разуменнем да іх нялёгкай, але ганаровай працы. І самае каштоўнае - гэта, вядома, магчымасць асабістай размовы з Кіраўніком дзяржавы. Якімі будуць для краіны найбліжэйшыя гады? Аляксандр Лукашэнка падзяліўся сваім прагнозам. Беларусь будуць выпрабоўваць, і трэба быць гатовымі адказаць на гэта. Мінулы год для кожнага быў розным. Але трэба глядзець наперад з надзеяй і памкненнем да лепшага.
Вераніка Бута пабывала на ўрачыстым прыёме. Гэта ўжо добрая традыцыя калядных дзён, калі Прэзідэнт асабіста адзначае заслугі тых, хто сваёй працай фарміруе пачуццё гонару за Беларусь; хто, асвятляючы важныя падзеі жыцця краіны, часцяком на другі план ставіць сваё асабістае жыццё; па чыёй працы, поспехах спартыўных і творчых, навуковых адкрыццях судзяць аб іміджы ўсяго народа. На міжнароднай арэне, у інфармацыйнай і эканамічнай сферах.
Фармат прыёму за гэтыя гады злёгку змяніўся. Журналісцкі пул дапоўніўся пулам эстрадным, спартыўным, камандай дзяржслужбоўцаў. Усе гэтыя людзі робяць краіну мацнейшай, умацоўваюць суверэнітэт нашай маладой дзяржавы. З аднаго боку, сёння ў гэтай зале падвялі вынікі года мінулага, з іншага - паставілі перад сабою новыя мэты. Так, год будзе не простым, але вельмі цікавым, адзначыў сёння Аляксандр Лукашэнка.
Крок за крокам неназойліва, але вельмі паспяхова Мінск удзельнічае ў пабудове новай еўрапейскай архітэктуры стабільнасці. Вялікая Еўропа ўсё часцей выбірае беларускую сталіцу, каб гаварыць пра бяспеку ў рэгіёне і ў свеце. І ўсё гэта не без паспяховай працы нашага знешнепалітычнага штаба, які кожны дзень працуе на прасоўванне іміджу нашай краіны на сусветнай арэне. Сёння кіраўнік ведамства ўдастоены ордэна Айчыны ІІІ ступені. Уладзімір Макей упэўнены, такая традыцыя сустракацца перад старым Новым годам павінна жыць і далей.
Больш за 200 чалавек: кіраўнікі дзяржструктур, спартсмены, СМІ, прадстаўнікі творчай інтэлігенцыі - напярэдадні старога Новага года збіраюцца ў адной зале, каб пацешыцца поспехамі адно аднаго. Дыпломы аб прысваенні звання заслужанага артыста Беларусі атрымалі спявачка Іскуі Абалян-Бароўская, актрыса Валерыя Арланава і артыстка балета Людміла Хітрова. Гімнастцы Кацярыне Галкінай Аляксандр Лукашэнка ўручыў дыплом аб прысваенні ганаровага звання заслужанага майстра спорту Рэспублікі Беларусь. А медаля Францыска Скарыны ўдастоены Руслан Аляхно.
Сёння дзелавыя касцюмы, сцэнічныя вобразы, спартыўны абутак яны змянілі на вячэрнія сукенкі, смокінгі і туфлі на высокіх абцасах. Цалкам у новым абліччы, але са старымі звычкамі - нават у такім нефармальным становішчы размовы аб працы, аб падзеях у краіне і свеце. І нават сёння ў гэтых людзей тэлефон заўсёды і для ўсіх даступны. Нават нягледзячы на тое што праз некалькі хвілін ім выхадзіць па ўзнагароду.
Падзякі Прэзідэнта ўдастоеная намеснік загадчыка аддзела аглядальнікаў палітычных Агенцтва тэленавін Наталля Голуб. Працу на тэлебачанні наша калега пачынала пад прозвішчам Брэвус, яго і пакінула для эфіру, нягледзячы на змену сямейнага статусу. Такія выпадкі не рэдкасць у рэпарцёрскім асяроддзі.
Генеральны прадзюсар Белтэлерадыёкампаніі і выканаўчы - дзіцячага "Еўрабачання". Глеб Шульман - адзін з тых людзей, хто стварыў фантастычнае шоу на "Мінск-Арэне", якое ў канцы года прагрымела на ўсю Еўропу.
Дзіцячае "Еўрабачанне" было выпрабаваннем года для арганізатараў. Усё і заўсёды трымаць на кантролі, вырашаць, здавалася б, невырашальныя задачы, быць на сувязі круглыя суткі, забыць, што такое выхадныя, і ў рэжыме нон-стоп працаваць месяцамі. Іспыт здалі, і здалі яго на выдатна - Беларусі зноў атрымалася здзівіць нават самую вытанчаную публіку. За гэты еўравізійны поспех, ды і ў цэлым за шматгадовую плённую працу Глеб Шульман сёння прымае падзяку з рук Кіраўніка дзяржавы.
Падзякі Прэзідэнта ўдастоеныя і іншыя прысутныя ў гэтай зале. Напрыклад, галоўны рэдактар найбуйнейшага моладзевага выдання "Знамя юности", начальнік інфармацыйна-аналітычнага аддзела Нацыянальнага прэс-цэнтра. Але гэта далёка не ўсе, хто варты ўзнагарод і падзяк.
Пачатак года ў нашай краіне заўсёды адзначаны добрымі традыцыямі. Змяняюць адно аднаго хакейны турнір, дабрачынныя акцыі, прэмія "За духоўнае адраджэнне” і сённяшні навагодні прыём. Увесь калядны тыдзень, ды амаль калядны месяц напоўнены святлом, дабром і цяплом. Калі не так ужо страшныя маразы, нават калядныя. Калі сонца ў гэтыя часцяком пахмурныя дні замяняюць сафіты і бляск вачэй. Калі створана добрая аснова для паспяховага новага года і новых дасягненняў.
