Ад пытанняў уборачнай кампаніі і палявых работ, вытворчасці сельгастэхнікі да комплекснага развіцця рэгіёна і вобласці. Прэзідэнт правёў інспекцыю Іўеўскага раёна Гродзеншчыны.
Аляксандру Лукашэнку далажылі аб ходзе жніва, дзе ўжо па традыцыі Гродзенская вобласць у лідарах. Кіраўнік дзяржавы яшчэ раз адзначыў, што неабходна дзейнічаць разумна - мінімізаваць страты пры ўборцы ўраджаю, асабліва з улікам кукурузы. Мэта - сабраць не менш за 9 мільёнаў тон. Таксама Аляксандр Лукашэнка заклікаў рэгіёны падыходзіць самастойна да нарыхтоўкі кармоў. Вывучыць беларускі лідар у найбліжэйшы час і сітуацыю з перапрацоўкай лёну. Так, у параўнанні з мінулым годам ураджайнасць у цяперашнім сезоне амаль у два разы вышэйшая. Аляксандр Лукашэнка плануе наведаць Карэлічы і Дзятлава, дзе азнаёміцца з працай ільнозаводаў, якія завяршылі мадэрнізацыю. У цэлым Прэзідэнт мае намер надаць асаблівую ўвагу раёнам, аддаленым ад абласных цэнтраў.
Дэталёва Кіраўнік дзяржавы азнаёміўся з працай прыватнага вытворцы сельгастэхнікі - там за першае паўгоддзе экспартавалі машын на 3 мільёны долараў. Новы рынак - Узбекістан, куды накіруюць беларускія агрэгаты ўжо ў хуткім часе. Таксама кіраўніцтва кампаніі папрасіла падтрымкі ў дзяржавы ў вырашэнні некаторых пытанняў: правядзенне выпрабаванняў тэхнікі, падтрымка за мяжой на буйных выставах і выдзяленне месцаў для прыватнікаў у гандлёвых дамах дзяржаўных прамысловых прадпрыемстваў. Засяродзіў Аляксандр Лукашэнка ўвагу і на працы бізнесу ў дрэваапрацоўцы. Дзяржава гатова аказаць садзейнічанне прадпрымальнікам і нават выдзеліць плошчы пад пашырэнне вытворчасці.
Наступны прыпынак Прэзідэнта - Іўеўскі цэнтр культуры, дзе мясцовы ансамбль паказаў невялікі фрагмент спектакля. Маладым тэатралам Аляксандр Лукашэнка параіў паступаць у Акадэмію мастацтваў. Усім артыстам ад імя Кіраўніка дзяржавы ўручылі шакалад "Прэзідэнт". Пасля Аляксандр Лукашэнка наведаў выставу майстроў народнай творчасці і пагутарыў з жыхарамі горада.
Невялікае мястэчка Іўе яшчэ называюць сімвалам беларускай рэлігійнай талерантнасці. Горад наглядна дэманструе, як трэба жыць у міры і згодзе. Пры агульнай колькасці насельніцтва каля 8 тысяч чалавек тут не адно стагоддзе мірна суіснуюць чатыры канфесіі. У знак гэтага на цэнтральнай плошчы быў усталяваны манумент "Адзінства чатырох канфесій". Сёння ў Іўі здзейснілася дзіцячая мара дзвюх сясцёр з біблейскімі імёнамі Ясфір і Авігея. З чацвёртага класа яны марылі пазнаёміцца і зрабіць фатаграфію з Прэзідэнтам.
