Болевыя пункты беларускай аховы здароўя. Як вырашыць праблемныя моманты гэтай сферы і як будзе развівацца айчынная медыцына? Свой погляд і падыходы Прэзідэнту на тыдні прапанаваў профільны міністр. Уладзімір Каранік на пасадзе кіраўніка Міністэрства аховы здароўя два месяцы. Прызначаючы яго на пасаду, Кіраўнік дзяржавы сказаў проста: "Трэба навесці парадак!"
І тут важна ўсё - ад справядлівага цэнаўтварэння на лекі і працы без пасрэднікаў пры закупцы абсталявання да эфектыўнага выкарыстання высокатэхналагічнай медтэхнікі. Ну і, вядома, кадравая палітыка. Сярод прапаноў міністра - стварыць сумесна з беларускімі айцішнікамі інфармацыйную платформу, дзе анлайн будуць адлюстроўвацца ўсе закупкі для медустаноў. Гэта дапаможа выкараніць шэрыя схемы - усё будзе зразумела і празрыста. Ініцыятыву Прэзідэнт падтрымаў.
Гаварылі аб даступнасці спецыялізаванай дапамогі - размова аб тым, каб не пацыент ехаў па яе ў цэнтр, а высокія медыцынскія тэхналогіі прыходзілі ў рэгіёны. Пры стварэнні міжрэгіянальных медцэнтраў будуць улічваць правіла залатой гадзіны - на працягу 60 хвілін пацыент павінен быць дастаўлены ў сучасную клініку. Калі адлегласць не дазваляе, такія цэнтры абсталююць рэанімабілямі.
Асобна спыніліся на цэнаўтварэнні. Міністэрства аховы здароўя працягне маніторынг цэн у аптэках з мэтай магчымага іх паніжэння. Што датычыцца прэпаратаў, якія не выпускаюцца ў краіне, іх рэгістрацыю на беларускім рынку плануюць спрасціць. Асаблівую ўвагу нададуць якасці прэпаратаў: выбарачна правераць усе лекі, незалежна ад краіны вытворцы.
Аб тым, што ў найбліжэйшыя год-два істотна зменяцца і звычайныя паліклінікі, профільны міністр расказаў у праекце "Размова ў Прэзідэнта". Будуць перагледжаныя падыходы ў арганізацыі працы першаснага звяна аховы здароўя - прааналізаваны функцыянал медперсанала і іх нагрузка.
У грамадзян з'явіцца магчымасць атрымаць кансультацыю ў прыёмных пакоях шматпрофільных бальніц, што таксама часткова разгрузіць участковых урачоў. Плануюць стварыць адзіную інфармацыйную платформу, якая дазволіць знізіць наплыў пацыентаў і спросціць атрыманне медыцынскіх дакументаў.
