Міжнародная бяспека, процідзеянне тэрарызму і экстрэмізму. У Ерэване сёння прайшла сесія Савета калектыўнай бяспекі АДКБ.
Саміт сабраў прадстаўнікоў 6-ці дзяржаў - удзельнікаў міжнароднай арганізацыі. У прэзідэнцкім палацы, дзе праходзіць сустрэча, Аляксандра Лукашэнку прывітаў кіраўнік Арменіі Серж Саргсян. Дарэчы, у наступным годзе старшынства ў АДКБ ад Арменіі пераходзіць да Беларусі. Гэтую місію краіны бяруць на сябе ў алфавітным парадку. Такая традыцыя.
Эксперты нярэдка называюць Беларусь адным з самых ініцыятыўных удзельнікаў міжнародных аб'яднанняў. Прыярытэтныя кірункі на перыяд старшынства Беларусі сёння таксама абмеркавалі падчас сустрэчы. Гаворачы аб супрацоўніцтве АДКБ з іншымі аб'яднаннямі, Аляксандр Лукашэнка акцэнтаваў - чакаць прызнання з боку НАТА не варта.
На парадку дня ерэванскага саміту было больш за 20 пытанняў. Сёння ўзгаднілі стратэгію калектыўнай бяспекі да 2025 года. У дакуменце перад арганізацыяй пастаўлены задачы на перспектыву і вызначаны меры, накіраваныя на папярэджанне пагроз бяспекі АДКБ. Падрабязнасці сустрэч у Ерэване - сёння ў "Панараме".
