Сёння раніцай у Мінску лідары дзвюх краін адкрылі Беларуска-кітайскі міжрэгіянальны бізнес-форум. Як адзначыў Аляксандр Лукашэнка, узаемадзеянне паміж рэгіёнамі і прадпрыемствамі павінна стаць вядучай рухаючай сілай супрацоўніцтва Беларусі і Кітая. Кіраўнік беларускай дзяржавы звярнуў увагу на тое, што такі маштабны праект пачынае сваю працу ўпершыню, і гэта сведчыць аб новым узроўні двухбаковых адносін, заснаваных на ўсебаковым стратэгічным партнёрстве.
Аляксандр Лукашэнка, Прэзідэнт Рэспублікі: "Задача форуму - напоўніць канкрэтным зместам двухбаковае стратэгічнае партнёрства. Пры гэтым асаблівую важнасць набываюць наладжванне сяброўскіх кантактаў, асабістых сувязяў сярод кіраўнікоў і рэгіёнаў, і прадпрыемстваў, што надасць моцны стымул развіццю дзелавых абменаў. Сёння ва ўсіх абласцей Беларусі ёсць пабрацімы і партнёры па супрацоўніцтве ў Кітаі. Я толькі што задаў пытанне губернатарам Беларусі, што яшчэ трэба зрабіць для таго, каб вы эфектыўна супрацоўнічалі з КНР, са сваімі партнёрамі ў рэгіёнах. Гавораць, нічога не трэба, усё ёсць. А ў некаторых нашых гарадоў, абласцей і па некалькі партнёраў і пабрацімаў. Гэта таксама значны фактар для ўстанаўлення больш цеснай эканамічнай кааперацыі. У рэгіянальным узаемадзеянні ў першую чаргу патрэбна рэалізацыя інвестыцыйных праектаў у самых розных галінах. У цяперашні час у Беларусі створаны ўнікальныя ўмовы для інвеставання. Адкрыўшы вытворчасці ў Беларусі, кітайскі бізнес зможа скарыстацца бесперашкодным выхадам на рынак Еўразійскага эканамічнага саюза. Кітайскія інвестары змогуць упэўніцца на сваім вопыце ў тым, што працаваць у Беларусі камфортна і выгадна. А кіраўнікі дзвюх краін будуць іх у гэтым падтрымліваць".
Аляксандр Лукашэнка запэўніў Сі Цзіньпіна, што Беларусь зробіць усё неабходнае для эфектыўнага прасоўвання Кітаем сваіх інтарэсаў у Еўропе, і выказаў падзяку Старшыні КНР за асабістае садзейнічанне ў паездцы такой прадстаўнічай дэлегацыі ў нашу краіну. "Для Беларусі гэта вялікі знак, і мы павінны ім скарыстацца", - падкрэсліў Прэзідэнт. У сваю чаргу Сі Цзіньпін заявіў, што Кітай зацікаўлены ў развіцці ўсебаковага супрацоўніцтва з Беларуссю, у тым ліку і на міжрэгіянальным узроўні.
Сі Цзіньпін, Старшыня КНР: "Мы гатовыя выкарыстаць фонд "Шаўковага шляху" для развіцця міжрэгіянальнага супрацоўніцтва. Умацаванне фінансава-крэдытнай падтрымкі, у тым ліку малога і сярэдняга бізнесу Беларусі і Кітая, павінна паспрыяць умацаванню сувязяў паміж рэгіёнамі. Таму кітайскія бізнесмены павінны скарыстацца магчымасцю і вывучыць перспектывы ўзаемадзеяння з беларускімі партнёрамі. Упэўнены, што, дзякуючы актыўнаму ўдзелу рэгіёнаў, беларуска-кітайскія адносіны паднімуцца на новую прыступку".
Сі Цзіньпін адзначыў, што Беларусь размешчаная адначасова і ў цэнтры Еўропы, і на новым "Шаўковым шляху" і валодае ўнікальнымі перавагамі для развіцця эканамічнага пояса. На думку Старшыні КНР, для ўмацавання сувязяў паміж рэгіёнамі неабходна палепшыць бізнес-клімат. Акрамя таго, важна прасоўваць вытворчую кааперацыю. Сі Цзіньпін адзначыў, што Кітай гатовы падзяліцца з Беларуссю перадавымі тэхналогіямі ў такіх сферах, як чыгунка і сувязь. І як стала вядома, па выніках Беларуска-кітайскага бізнесфоруму паміж краінамі падпісана 25 пагадненняў.
