Урад Беларусі прапаноўвае ўдасканаліць умовы прадпрымальніцкай дзейнасці ў малых, сярэдніх гарадах і сельскай мясцовасці.
Планаваныя змяненні абмяркоўвалі сёння на нарадзе ў Прэзідэнта. Для стымулявання працы камерцыйных арганізацый і ІП у рэгіёнах у 2012 годзе быў прыняты Дэкрэт №6. Сёння ўрад прапаноўвае Прэзідэнту ўнесці ў дакумент новыя папраўкі.
Васіль Мацюшэўскі, першы намеснік прэм'ер-міністра Беларусі: "За 2,5 года ад дзеяння Дэкрэта №6 - з 1 ліпеня 2012 па 1 студзеня 2015 - колькасць суб'ектаў гаспадарання на тэрыторыі сярэдніх і малых гарадоў і ў сельскай мясцовасці павялічылася на 38%. Зарэгістравана больш як 35 тыс. арганізацый і індывідуальных прадпрымальнікаў. У той жа час у буйных гарадах прырост склаў 2,6%".
Дзяржава кампенсуе суб'ектам гаспадарання сумы штрафных санкцый, выкарыстаных да іх у выніку неадназначнасці трактавання норм дэкрэта. Такое рашэнне Аляксандр Лукашэнка прыняў па выніках нарады. У цэлым прапанаваныя ініцыятывы Кіраўнік дзяржавы сёння падтрымаў. Зараз урад бярэ паўзу на дапрацоўку прапаноў. На гэта, паводле слоў першага віцэ-прэм'ера, запатрабуюцца два-тры тыдні.
Васіль Мацюшэўскі, першы намеснік прэм'ер-міністра Беларусі: "Было прынята рашэнне ў частцы парадку стварэння новых прадпрыемстваў. Мы выразна вызначылі дзе, на якіх умовах гэтыя прадпрыемствы ствараюцца. Другі тэзіс: у свой час у рамках Дэкрэта №6 была перададзеная вялікая колькасць нявыкарыстаных плошчаў, і, на жаль, некаторыя прадпрыемствы так неэфектыўна дагэтуль выкарыстоўваюць гэтыя плошчы, вось гэтае пытанне мы абмеркавалі. І было адно пытанне, звязанае з парадкам фарміравання статутных фондаў, вось дзе і ўзнікла асноўная калізія, дзе шэраг суб'ектаў гаспадарання атрымалі нейкія негатыўныя вынікі. Дык вось тут прынята пазітыўнае рашэнне, я мяркую, мы гэтую калізію ўхілім, а гэтыя прадпрыемствы атрымаюць сатысфакцыю".
