Зберагчы краіну і перадаць яе вольнай і незалежнай наступным пакаленням. Гэта агульная задача беларусаў. Такія словы сёння Аляксандр Лукашэнка адрасаваў лаўрэатам прэміі "За духоўнае адраджэнне" і спецыяльных прэмій Прэзідэнта.
Сімвалічна, што гэтая цырымонія штогод праходзіць у студзені, у калядныя дні. Узнагароды атрымліваюць людзі, якія ўносяць неацэнны асабісты ўклад у развіццё ўсёй краіны і грамадства, а вынікам іх працы ганарыцца ўся Беларусь.
Па выніках мінулага года прысвоена 5 прэмій "За духоўнае адраджэнне"... Сярод тых, хто іх удастоены, - настаяцель Свята-Елісееўскага Лаўрышаўскага мужчынскага манастыра ігумен Яўсевій. Ён дапамагае людзям, якія апынуліся ў цяжкай жыццёвай сітуацыі. Лаўрэатамі прэміі сталі калектыў Рэспубліканскага рэабілітацыйнага цэнтра для дзяцей-інвалідаў, а таксама Беларускага дзяржаўнага педагагічнага ўніверсітэта імя Максіма Танка. Узнагароды ўдастоена Федэрацыя прафсаюзаў Беларусі за правядзенне мерапрыемстваў, накіраваных на патрыятычнае выхаванне. Адно з іх - маштабная рэканструкцыя Кургана Славы. Сярод лаўрэатаў прэміі таксама загадчык кафедры архітэктуры Беларускага нацыянальнага тэхнічнага ўніверсітэта Сяргей Сергачоў за адзіную ў сваім родзе кнігу "Народнае дойлідства Беларусі". Па выніках 2016 прысуджаны і 10 спецпрэмій Прэзідэнта дзеячам культуры і мастацтва. Сярод уладальнікаў і калектыў Белтэлерадыёкампаніі за стварэнне серыі ролікаў "Мы зрабілі гэта разам". Падрабязнасці ўрачыстай цырымоніі - у эфіры "Панарамы".