Надаць Мінску і ўсёй сталічнай агламерацыі з гарадамі-спадарожнікамі закончаную, прадуманую і камфортную для гараджан агранку. Давесці алмаз забудовы да дасканаласці форм і індывідуальнасці брыльянта. Менавіта такую задачу паставіў сёння Кіраўнік дзяржавы перад архітэктарамі горада і вобласці і сталічнымі граданачальнікамі. Пры гэтым Прэзідэнт акцэнтаваў увагу на якасці - добрасумленнасць замежных інвестараў і нашых будаўнікоў. А таксама на цане пытання - максімальная эканомія, але не на шкоду эстэтыцы і функцыянальнасці, комплекснасці. Г.з. асобныя шкельцы-небаскробы, зялёныя зоны, скульптуры або старыя дамы не павінны парушаць ансамбля сталічнай забудовы. Гэта твар горада, краіны, наша візітная картка ў свеце, а таму эксперыментаў і неакуратнасці пры забудове быць не павінна, падкрэсліў беларускі лідар.
Жорсткія даручэнні прагучалі сёння ў сталічнай ратушы і па самых надзённых для гараджан пытаннях. Ушчыльненне - толькі кропкавае і там, дзе гэта не знішчае архітэктурную задумку. Паркоўкі - якія адсякаюць на ўездзе ў цэнтр горада і па дыяметры кальцавой, каб горад не задушыўся ад транспарту. Зялёная зона - акуратна захаваць усе гістарычныя мінскія алеі і дадаць новыя: і ля Нацбібліятэкі і ўздоўж праспекта Пераможцаў, і на набярэжнай Свіслачы - у самым сэрцы сталіцы. Гарады-спадарожнікі - аддаць людзям пад забудову пусткі і мікрапляцоўкі, да якіх не даходзяць рукі інвестараў, наладзіць транспартныя зносіны, напрыклад, узвесці новую хуткасную трасу да аэрапорта праз Кітайска-беларускі парк і мікрараён Сокал. Нарэшце завяршыць і добраўпарадкаваць 2-ю кальцавую аўтадарогу. Каб не проста бетон, але і запраўкі, і сэрвіс, і кафэ, і новае аблічча сумежных вёсак. У цэлым па выніках нарады на агранку мінскай агламерацыі лідар адвёў паўтара-два гады. Але вынік мінчане і госці сталіцы павінны адчуць значна раней.
