У Беларусі заўсёды будуць беражліва ставіцца да свайго культурнага здабытку. Але галоўная каштоўнасць дзяржавы - гэта людзі, якія сваім талентам, творчасцю і працавітасцю прымнажаюць яго славу.
З такімі словамі Прэзідэнт Аляксандр Лукашэнка звярнуўся сёння да гасцей урачыстай цырымоніі ў Палацы Рэспублікі. У гэтыя святочныя калядныя дні па традыцыі адзначаюць заслугі дзеячаў гуманітарнай сферы - работнікаў культуры, майстроў мастацтва, святароў і сацыяльных работнікаў. Усіх тых, хто робіць асаблівы ўклад у справы міласэрнасці і дабрачыннасці, прасоўвае ідэі гуманізму.
У спісе лаўрэатаў прэстыжнай прэміі "За духоўнае адраджэнне" аўтары музыкі і тэкстаў песень Юлія Быкава і Яўген Алейнік за ўвасабленне тэмы малой радзімы ў сучасным эстрадным мастацтве. Прэмія прысуджана калектывам Біблейскай камісіі Беларускай праваслаўнай царквы і секцыі па перакладзе літургічных тэкстаў і афіцыйных дакументаў Каталіцкай царквы за пераклад з арыгінальных моў і выданне кніг Новага Запавету на беларускай мове, што спрыяе прымнажэнню духоўнай спадчыны. Высокая ўзнагарода ў калектыва дзіцячага хоспіса і Вясноўскага дома-інтэрната для дзяцей-інвалідаў з асаблівасцямі псіхафізічнага развіцця.
Спецпрэміяй Прэзідэнта дзеячам культуры і мастацтва адзначаны Акадэмічны ансамбль песні і танца Узброеных Сіл і калектыў Беларускай харэаграфічнай гімназіі-каледжа. Сярод уладальнікаў узнагароды таксама калектыў Пастаўскага тэрытарыяльнага цэнтра сацабслугоўвання і народны сямейны ансамбль "Сваякі" з Ваўкавыска. Прэмія прысуджана народнаму артысту Беларусі Віктару Манаеву і ўладальніцы тытулаў "Міс Беларусь - 2018" і "Міс свету Еўропа" Марыі Васілевіч. Ушаноўвалі і тых, каму пакарыўся "Беларускі спартыўны алімп". Сярод лаўрэатаў гэтай спецпрэміі Прэзідэнта лёгкаатлетка Вольга Мазуронак, вядомы журналіст і дакументаліст Барыс Герстан, трэнер Ірына Бараноўская. Тэлеверсію ўрачыстай цырымоніі ўручэння прэміі "За духоўнае адраджэнне" глядзіце адразу пасля "Панарамы".
