Беларускія ўлады не супраць прыватызацыі, але яна не павінна быць абвальнай або шокавай. Пра гэта Прэзідэнт Аляксандр Лукашэнка заявіў сёння на сустрэчы з віцэ-прэзідэнтам Еўрапейскага банка рэканструкцыі і развіцця Аланам Пію.
У 2016 годзе банк прыняў чатырохгадовую стратэгію для Беларусі, дзе прызнаецца павышэнне ўзроўню міжнароднай адкрытасці краіны. Сёння, на экватары выканання дакумента, аналітыкі ЕБРР паказваюць на эфектыўнасць беларускай эканомікі. Другі год запар Еўрапейскі банк рэканструкцыі і развіцця паляпшае прагноз па росце ВУП нашай краіны. На 2018 - плюс 2 %. Банк падкрэслівае зацікаўленасць у супрацоўніцтве з Мінскам і мае намер штогод інвеставаць у нацыянальную эканоміку мільёны долараў. Высокую ступень даверу ў супрацоўніцтве вызначае рэпутацыя партнёраў. Пра гэта сёння гаварылі ў Палацы Незалежнасці.
Кіраўнік беларускай дзяржавы асобна спыніўся на пытаннях удзелу ЕБРР у прыватызацыі айчынных прадпрыемстваў, падкрэсліўшы, што яна павінна найперш адпавядаць інтарэсам народа.
З ліку заходніх фінансавых інстытутаў Еўрапейскі банк рэканструкцыі і развіцця - адзін з галоўных прамых інвестараў нашай эканомікі. Да арганізацыі Беларусь далучылася ў 1992. За 25 гадоў партнёрства амаль сотня значных праектаў - ад вытворчасці напояў да пасажырскага транспарту. Інвеставана каля двух мільярдаў еўра. Сфера ўжывання выгадных крэдытаў: дарожная інфраструктура, малы і сярэдні бізнес, банкаўскі сектар і кіраванне дзяржпрадпрыемствамі.
