Наша краіна разглядае арабскую дзяржаву як перспектыўнага гандлёвага і інвестыцыйнага партнёра ў рэгіёне Персідскага заліва. Спрыяе гэтаму і актывізацыя афіцыйных кантактаў на ўрадавым і парламенцкім узроўнях. Ужо адзначаная станоўчая дынаміка ў развіцці гандлю. Аднак тавараабарот зараз вельмі нізкі. Як адзначыў Прэзідэнт, "мы ў пачатку шляху". І гэтымі днямі Мінск і Маскат пішуць новы раздзел у гісторыі супрацоўніцтва дзвюх дзяржаў. Напярэдадні першага сумеснага бізнес-форуму, які пройдзе заўтра, адбылася канкрэтнная размова наконт узаемадзеяння, а таксама актывізацыі гандлёва-эканамічнага супрацоўніцтва. Аляксандр Лукашэнка падкрэсліў: Беларусь гатовая развіваць адносіны з Аманам па ўсіх напрамках.
Падрабязнасці сустрэчы ў Андрэя Лапцёнка. Доўгі час лічылася, што эканоміка арабскіх дзяржаў была, ёсць і будзе заснаваная выключна на нафце. Збольшага так. Дзякуючы каласальным запасам вуглевадародаў краіны Аравійскага паўвострава развіваюцца імклівымі тэмпамі, укладваючы вялікія сродкі ў сацыяльную сферу. Але глабальную ролю краін Персідскага заліва па-сапраўднаму свет адчуў, калі арабскія інвестыцыі пацяклі за мяжу. Іх памер уражваў, што нядзіўна, бо сярэднія тэмпы росту краін паўвострава за апошнія два дзесяцігоддзі - 5%. Кожная з іх своеасаблівая і тым прывабная для знешніх партнёраў у якасці і імпарцёра, і экспарцёра. Не выпадкова, праводзячы палітыку дыверсіфікацыі рынкаў збыту, Беларусь у свой час на адносіны з гэтым рэгіёнам зрабіла асаблівую стаўку. Дарэчы, сёння самі арабы нашу краіну называюць найбольш актыўным партнёрам ад СНД на Блізкім Усходзе. Аман для Беларусі ў гэтым шэрагу дзяржава асаблівая. Акрамя інтарэсаў бізнесу, нас аб'ядноўвае статус мірных перагаворных пляцовак. Захаваўшы ў перыяд "Арабскай вясны" ўнутрыпалітычны спакой у сябе, султанат, які выступае з пазіцый нейтралітэту, сёння галоўная прыміральная сіла ў рэгіёне. У гэтым яго ўнікальнасць.
Унікальнасць Амана і ў яго суседзях. Магутны Іран, найбуйнейшая сучасная манархія - каралеўства Саудаўская Аравія, плюс непрадказальны і вельмі нестабільны Емен. Фактычна краіна знаходзіцца на скрыжаванні сутыкнення інтарэсаў няпростых краін. І тут жа нафтавы калідор, па якім вуглевадароды ідуць па ўсім свеце. Зрэшты, на фоне амбіцый суседзяў пазіцыя Амана адрозніваецца выключнай узважнасцю.
У гэтым плане аманцы вельмі падобныя на міралюбных беларусаў. Менавіта так - выверана, крок за крокам - мы ішлі да сённяшняга ўзроўню двухбаковых адносін.
У Амане, як і ва ўсім рэгіёне, хутка фарміруецца рынак капіталу, сталіца Маскат ператвараецца ў прыкметны фінансавы цэнтр. Геаграфічнае становішча краіны дазваляе злучаць тры кантыненты, а геапалітычнае вызначае вагу ў міжнародным гандлі. Аман абсалютна бяспечны для інвестыцый. Узровень інфляцыі султаната ніжэйшы за 3%. Для беларускіх прадуктаў гэта добры рынак і ў перспектыве лёгкі доступ у Афрыку і Азію.
Зрэшты, выкарыстоўваючы рынак Амана, Беларусь у адказ гатовая прапанаваць арабскім партнёрам сваё пасрэдніцтва ў асваенні куды большага рынку.
Амаль дзесяць гадоў таму, у 2007-м, першы афіцыйны візіт Аляксандра Лукашэнкі ў Аман фактычна вызначыў вектар супрацоўніцтва. Зрэшты, сусветны фінансавы крызіс парушыў планы, і праекты ў сферы гандлю і інвестыцый паклалі ў стол да лепшых часоў. Двухбаковыя кантакты актывізаваліся за апошнія два гады. Сёлета ў сакавіку адбыліся візіты беларускіх міністраў гандлю і адукацыі ў Аман.
А ўжо сёлета ў маі Мінск наведала дэлегацыя на чале са старшынёй Аманскай гандлёва-прамысловай палаты. Ацаніўшы яшчэ тады патэнцыял супрацоўніцтва, спадар Саід Аль-Кіюмі ў склад цяперашняй дэлегацыі ўключыў прадстаўнікоў усяго буйнога аманскага бізнесу.
Саід Аль-Кіюмі, старшыня гандлёва-прамысловай палаты Амана: "Працуючы над дарожнай картай, мы абмеркавалі шэраг канкрэтных напрамкаў, па якіх мы гатовыя і будзем развіваць супрацоўніцтва. Мы вывучылі вашу краіну, ведаем: Беларусь моцная прамысловасцю, вытворчасцю, рознага роду тэхнікай, самазвалы, сельскагаспадарчая тэхніка, галіна высокіх тэхналогій. Сфера турызму для нас перспектыўная".
Канчатковы варыянт дарожнай карты пакуль у стадыі прапрацоўкі. Але ў сённяшняй гутарцы канкрэтныя тэмы. Аляксандр Лукашэнка прапануе кожнаму з гасцей адну рэальную справу ў Беларусі. Прыгледзецца да нашых магчымасцяў аманскія бізнесмены маглі ўжо сёння падчас наведвання шэрагу беларускіх прадпрыемстваў. На "Амкадоры" для гасцей з Персідскага заліва арганізавалі паказальныя выступленні тэхнікі. На некаторыя "нумары" стрыманыя ў звычайным жыцці прадпрымальнікі з Усходу (дарэчы, трое з іх - доларавыя мільярдэры) рэагавалі нават апладысментамі. На "Амкадоры" адбылася і прадметная гутарка наконт магчымых варыянтаў супрацоўніцтва. У прыватнасці, абмяркоўвалася адкрыццё беларуска-аманскага прадпрыемства, якое зоймецца пастаўкамі тэхнікі ў султанат.
Мустафа Ахмед Салман, старшыня праўлення кампаніі (Аман): "Сапраўды, мы ўбачылі выдатныя, насамрэч уражальныя тэхналогіі. Радуе, што гэта тэхніка мае канкурэнтную цану ў параўнанні з іншымі еўрапейскімі брэндамі. Кошт такіх машын адыграе важную ролю ў росце паставак беларускай прадукцыі ў наш рэгіён, асабліва ў Аман. У вас добрая вытворчая база. Я спадзяюся, што мы знойдзем добрых партнёраў у Амане для беларускіх машынабудаўнікоў і такім чынам пачнём развіваць паспяховае супрацоўніцтва".
Аман зацікаўлены ў развіцці сваёй прамысловасці і сельскай гаспадаркі. І тут, як адзначаюць аманцы, у Беларусі значны вопыт, які ім вельмі падыходзіць. Флагманскі праект, над якім зараз працуюць спецыялісты дзвюх краін, - пасоўванне тэхнікі МАЗ. Сёлета першыя экзэмпляры ўжо пастаўленыя.
Сяргей Рачкоў, Надзвычайны і Паўнамоцны Пасол Беларусі ў Егіпце, Амане, Алжыры і Судане па сумяшчальніцтве: "Гэта першыя важныя крокі. У Амане ў асноўным заходнія кампаніі, канкурэнцыя вялізная, не так проста ўвайсці. Але мы зрабілі першыя крокі. Другі праект - стварэнне лагістычнага цэнтра пад маркай "Амкадор". Плануем пастаўляць у Аман не толькі тэхніку "Амкадор", але і МАЗ, БелАЗ, Гомсельмаш і інш. І трэці напрамак - харчовы".
Ужо заўтра пляцоўкай дыялогу для бізнесменаў дзвюх краін стане першы ў гісторыі двухбаковых адносін бізнес-форум. Акрамя сарака найбуйных прадстаўнікоў аманскага бізнесу, яго ўдзельнікамі стануць без малога сто беларускіх прадпрымальнікаў.
