Ад узмацнення прамкааперацыі да запуску сумеснага венчурнага фонду па падтрымцы стартапаў. Гэта адны з дамоўленасцяў, дасягнутых па выніках сустрэчы ў Нур-Султане прэзідэнтамі Беларусі і Казахстана. Аляксандр Лукашэнка і Касым-Жамарт Такаеў правялі серыю перамоў. Былі адзначаныя добрыя перспектывы ў плане эканамічнага супрацоўніцтва. Тавараабарот Беларусі і Казахстана наблізіўся да мільярда долараў, і ў краін ёсць усе магчымасці, каб істотна павялічыць лічбу.
Прамкааперацыя - прыярытэт супрацоўніцтва
Наша краіна дапамагае Казахстану ў маштабных праектах, напрыклад, у праграмах развіцця прамысловасці і АПК. На рынку прапаноўваецца шырокая лінейка брэндаў беларускага аўтапрама. Менавіта таму краіны вызначылі прамысловую кааперацыю прыярытэтам эканамічнага супрацоўніцтва.
Зараз важна не проста захаваць тэмп адносін, але і паскорыцца ў шматлікіх кірунках. Нараўне з прамысловай кааперацыяй краіны дамовіліся развіваць супрацоўніцтва і ў іншых галінах эканомікі: сельскай гаспадарцы, транспарце і лагістыцы. Беларусь і Казахстан ужо даўно шчыльна працуюць у сферы высокіх тэхналогій. Адна з нашых ІТ-кампаній пачала ствараць сістэму бяспекі ў рэзідэнцыі прэм'ера Казахстана. Яшчэ адна прасоўвае ў Казахстане праекты па ўкараненні аўтаматызаванай сістэмы кантролю праезду. Наступным крокам лічбавага супрацоўніцтва стане запуск сумеснага венчурнага фонду для падтрымкі стартапаў. Абмяркоўвалі сёння і магчымасць паставак казахскай нафты ў Беларусь.
Беларусь і Казахстан падпісалі шэсць пагадненняў
Пасля перамоў прэзідэнты зрабілі сумесную заяву, у якой адлюстраваныя ключавыя моманты супрацоўніцтва на перспектыву. Акрамя таго, падпісаныя шэсць пагадненняў паміж краінамі. Напрыклад, урады дамовіліся больш шчыльна супрацоўнічаць у сферы міграцыі. У МЗСаў з'явіўся план узаемадзеяння на найбліжэйшыя некалькі гадоў. Працаваць у звязку стануць Следчы камітэт Беларусі і Генпракуратура Казахстана. Наш Прэзідэнт запрасіў Касым-Жамарта Такаева наведаць з афіцыйным візітам Беларусь у наступным годзе. Гэта магчымасць пракантраляваць выкананне сённяшніх дамоўленасцяў і выкананне падпісаных у Нур-Султане пагадненняў.
А. Лукашэнка сустрэўся з экс-прэзідэнтам Казахстана
І сёння ж Аляксандр Лукашэнка правёў сустрэчу з першым прэзідэнтам Казахстана. Нурсултан Назарбаеў вярнуўся ў Нур-Султан з Японіі, дзе прымаў удзел у цырымоніі ўступлення на прастол імператара. Сустрэчу з нашым прэзідэнтам, паводле яго слоў, ён ні ў якім разе не хацеў адмяняць. Як ганаровы старшыня ЕАЭС ён плануе прыняць удзел у наступным саміце саюза, які ў снежні адбудзецца ў Санкт-Пецярбургу. На памяць аб гэтай сустрэчы палітыкі абмяняліся падарункамі. Ад беларускага лідара і прадуктовы кошык, у ім прадукцыя айчынных брэндаў. Нурсултан Назарбаеў прэзентаваў Аляксандру Лукашэнку нацыянальны казахскі лук і кнігу філосафа і паэта Абая.
