Праца па стварэнні аднаго з самых маштабных беларуска-кітайскіх праектаў павінна быць актывізаваная. Аб будаўніцтве індустрыяльнага парка "Вялікі камень" сёння гаварылі ў Прэзідэнта. Дадзены праект з'яўляецца ключавым у адносінах дзвюх краін. Чаканні ад яго рэалізацыі - максімальныя: парк павінен стаць свайго роду цэнтрам прыцягнення інвестыцый і самых перадавых тэхналогій. Варта адзначыць, што ўказ аб яго працы Кіраўнік дзяржавы падпісаў летам мінулага года. Аднак пакуль аб актыўным працэсе будоўлі гаварыць не даводзіцца. Прэзідэнт адзначыў, што на шляху рэалізацыі беларуска-кітайскага праекта існуе яшчэ шэраг праблем. Усе падрабязнасці ў Дар'і Белавусавай-Пятроўскай.
Афіцыйны старт будаўніцтву беларуска-кітайскага індустрыяльнага парку быў дадзены летам 2014-га. Пад Смалявічамі, за 25 км ад Мінска, члены беларускага ўрада, кітайскія кіраўнікі і топ-менеджары сусветна вядомых кампаній заклалі сімвалічны камень нашых будучых адносін.
Праект - амбіцыйны. Нічога падобнага ў гісторыі незалежнай Беларусі яшчэ не было. Па размаху ён пераўзыходзіць нават зараджэнне ў 1958 годзе Салігорска, у якім зараз жывуць 100 тысяч чалавек. У індустрыяльным парку колькасць толькі працаўнікоў, паводле папярэдніх падлікаў, дасягне 120 тысяч. Усё дзякуючы выгаднаму геаграфічнаму становішчу.
Па-першае, парк размешчаны недалёка ад Мінска. А ў сталіцы сёння пражываюць амаль 2 мільёны чалавек, з іх 450 тысяч - студэнты. Па-другое, ён знаходзіцца побач з горадам-спадарожнікам Смалявічы. Колькасць насельніцтва - 15 тыс. чалавек. Усё гэта забяспечыць парк прафесійнымі кадрамі.
Па-трэцяе, побач знаходзяцца міжнародны аэрапорт, чыгунка, транснацыянальная аўтамабільная магістраль Берлін - Масква. І ўсяго 500 км да Клайпедскага порта на ўзбярэжжы Балтыйскага мора.
Індустрыяльны парк раскрые патэнцыял Беларусі як злучнага звяна паміж СНД, Расіяй і Еўропай. Таксама дасць магчымасць бяспошліннага ўваходу на рынак краін Еўразійскага эканамічнага саюза, а гэта амаль 200 млн. чалавек.
На сусветным рынку зараз ідзе сур'ёзная барацьба за фундатараў. Таму рэзідэнты індустрыяльнага парка атрымліваюць істотныя льготы. Іх можна выказаць формулай "10 плюс 10". Гэта значыць, першыя 10 гадоў яны вызваляюцца ад падатку на зямлю, маёмасць і прыбытак. А потым яшчэ 10 гадоў падатковая стаўка будзе паніжаная на 50%.
Тым не менш, нягледзячы на такія прэферэнцыі, існуе шмат праблем. Менавіта аб гэтым сёння гаварыў Кіраўнік дзяржавы, слухаючы даклад аб ходзе будаўніцтва аднаго з самых маштабных беларуска-кітайскіх праектаў. На думку Аляксандра Лукашэнкі, тэрміны прац зацягнутыя, з фінансамі нявызначанасць і вельмі слабая праца па прыцягненні фундатараў.
Як адзначыў Кіраўнік дзяржавы, будаўніцтва індустрыяльнага парка сёння адна з ключавых тэм беларуска-кітайскага супрацоўніцтва. "Вялікі камень" павінен стаць цэнтрам прыцягнення інвестыцый і самых перадавых тэхналогій. Тут будуць прадпрыемствы заўтрашняга дня: электроніка, біямедыцына, тонкая хімія, машынабудаванне і новыя матэрыялы.
Мікалай Снапкоў, намеснік кіраўніка Адміністрацыі Прэзідэнта Беларусі: "З улікам рэкамендацый кітайскага боку прайшоў конкурс паміж кампаніямі, якія будуць з'яўляцца генеральнымі падрадчыкамі будаўніцтва, унутранай інфраструктуры. І на дадзены момант мы фактычна пачынаем з красавіка поўнамаштабныя будаўнічыя працы па вытворчасці ўнутранай інфраструктуры. Пры гэтым мы ствараем неабходныя ўмовы для рэзідэнтаў парка, фундатараў, якія гатовыя прыйсці ў парк, магчымасць паралельнага праектавання і будаўніцтва".
Правобразам "Вялікага каменя" ў Беларусі стаў тэхнапарк у кітайскім Сучжоў. За 30 гадоў ён ператварыў горад у сучасны прамысловы мегаполіс. Адзін з галоўных кірункаў - аўтамабільная прамысловасць. І гэта толькі адзін прыклад з тысячы. Падлічыць колькі тэхнапаркаў сёння працуюць у Кітаі - даволі складана. Новых рэзідэнтаў прыцягваюць паніжанымі стаўкамі па крэдытах, нулявой арэндай першыя паўгода, а таксама дыферэнцыяваным падаткам на прыбытак.
Рэзідэнтамі індустрыяльнага парка гатовыя стаць шматлікія буйныя кітайскія кампаніі. Напрыклад, ZTE плануе будаўніцтва завода па вытворчасці тэлекамунікацыйнага абсталявання і кампанентаў для сістэм аўтатранспарту, малой энергетыкі і сувязі. А Huawei створыць цэнтр навукова-даследчых і канструктарскіх распрацовак.
Індустрыяльны парк, безумоўна, ключавы беларуска-кітайскі праект. З яго дапамогай краіна здзейсніць тэхналагічны скок. Паводле прагнозаў экспертаў, у будучыні "Вялікі камень" можа атрымаць дзясяткі мільярдаў долараў інвестыцый. Таму працу над паркам варта актывізаваць. Бо пад ляжачы камень, як вядома, вада не цячэ.
