Кіраўнік дзяржавы правёў перамовы з кіраўніцтвам гэтай уплывовай фінансавай арганізацыі. Адзначым, двухбаковае супрацоўніцтва з кожным годам умацоўваецца. Медыцына, ахова прыроды, дарожнае будаўніцтва, лясная гаспадарка - гэта тыя кірункі, па якіх Беларусь і Сусветны банк узаемадзейнічаюць актыўна. У ключы канструктыўнага дыялогу бакі маюць намер працаваць і надалей. Прычым на фінансавую падтрымку могуць разлічваць не толькі дзяржпрадпрыемствы, але і малы і сярэдні бізнес. У новай стратэгіі партнёрства таксама праекты ў сферы аховы здароўя, ЖКГ і энергетыкі. Пра што яшчэ дамовіліся на сустрэчы - падрабязна Ілона Красуцкая.
Калі малыя падрастуць, змогуць са здзіўленнем разглядаць гэтыя кадры. А бацькі абавязкова распавядуць пра клініку, якая выратавала ім жыццё. Рэспубліканскі навукова-практычны цэнтр "Маці і дзіця". Найноўшае абсталяванне і, што самае каштоўнае, спецыялісты. Яны выходжваюць малых вагой усяго 500 грамаў. Яшчэ некалькі гадоў таму ратаваць такіх дзетак медыкі нават не браліся.
Цэнтр з'явіўся ў 2004. "Маці і дзіця" - гэта, па сутнасці, вынік аб'яднання адразу некалькіх медустаноў. Новыя карпусы не будавалі, рэканструявалі за кошт дзяржаўнай інвестпраграмы. Мадэрнізацыя самай вялікай рэанімацыйнай клінікі ў Беларусі прадоўжыцца яшчэ 6 гадоў. Сродкі - 125 мільёнаў долараў - пазыка Сусветнага банка. І гэта толькі адзін з дзясятка праектаў, які падтрымлівае гэтая фінансавая арганізацыя ў Беларусі.
73 гады Сусветны банк падтрымлівае трансфармацыю эканомік у дзяржавах Еўропы і Цэнтральнай Азіі. І не толькі. Кліенты - 189 краін свету ад ЗША да Японіі. Да гэтай фінансавай арганізацыі Беларусь далучылася ў 1992 годзе. За чвэрць стагоддзя Банк трывала замацаваўся ў топе найбуйнейшых інвестараў. Партфель перавысіў паўтара мільярда долараў.
Усе праекты скіраваны на эканамічнае развіццё і паляпшэнне якасці жыцця. Больш за ўсё сродкаў пайшло на абнаўленне транспартнай сістэмы - агульная сума 400 мільёнаў долараў. Удасканаленне айчынных ЦЭЦ - 215 мільёнаў.
Мадэрнізацыя самай буйной цеплаэлектрастанцыі Магілёва, ЦЭЦ-1. Абнавілі газавыя турбіны, катлы і кампрэсары. Толькі на адным гэтым аб'екце краіна будзе эканоміць штогод да 3 мільёнаў долараў.
Віктар Салановіч, дырэктар філіяла "Магілёўскія цеплавыя сеткі" РУП "Магілёўэнерга": "За першы квартал бягучага года каля 15 тысяч тон умоўнага паліва сэканомлена за кошт дадатковай выпрацоўкі электраэнергіі. Мы прыкладна ў чатыры разы знізілі выкіды шкодных рэчываў у атмасферу за кошт таго, што на турбіне прымяняецца сухое падаўленне вокіслаў азоту".
Дэлегацыі Сусветнага Банка ў нашай краіне госці частыя. Антуражы Палаца Незалежнасці добра знаёмыя Сірылу Мюлеру. Меней як год таму віцэ-прэзідэнт Сусветнага банка па рэгіёне Еўропы і Цэнтральнай Азіі сустракаўся з Аляксандрам Лукашэнкам. А вось для яго калегі - старшага віцэ-прэзідэнта па аперацыйных пытаннях Кайла Пітэрса - першы візіт. Ён прадстаўляе групу Банка на сустрэчах "Вялікай дваццаткі", іншых міжнародных форумах. Кансультуе прадстаўнікоў краін-партнёраў па выдзяленні пазык і тэхдапамогі. Топ-менеджары ўплывовай фінансавай арганізацыі прыляцелі ў Мінск на два дні. Асноўная тэма перамоў ва ўрадзе і на вышэйшым узроўні - новая краінавая праграма для Беларусі.
Штогод Сусветны банк прэзентуе свой аўтарытэтны даклад.
Рэйтынг Doing Business - ілюстрацыя ўмоў вядзення бізнесу ў 190 краінах свету. Мы на 37-м радку. За год нам удалося падняцца ў топе "Вядзенне бізнесу" на сем пазіцый.
У ключы канструктыўнага дыялогу бакі маюць намер працаваць і далей. Сусветны банк гатовы аказваць Беларусі садзейнічанне ў павышэнні канкурэнтаздольнасці прадукцыі, дыверсіфікацыі і мадэрнізацыі вытворчасцяў.
Кайл Пітэрс, старшы віцэ-прэзідэнт Сусветнага банка па аперацыйных пытаннях: "Я вельмі рады знаходзіцца ў Беларусі. Я атрымаў магчымасць на справе ўбачыць, як развіваюцца тыя праграмы, якія Сусветны банк рэалізуе ў Беларусі. У нас зараз на парадку дня 9 праграм агульным коштам больш за 1 мільярд долараў у такіх сферах, як інфраструктура, водазабеспячэнне, энергетыка, транспартная сфера, адукацыя. І зараз мы пачынаем супрацоўніцтва ў галіне аховы здароўя. І я на справе змог пераканацца, што ўсе праграмы рэалізуюцца вельмі якасна. Мой візіт таксама звязаны з развіццём і зацвярджэннем новай краінавай праграмы для Беларусі на наступныя 3-4 гады".
Памеры крэдытнага партфеля Сусветнага банка ў кожнай краіне - важны індыкатар для інвестараў. Больш праектаў - больш даверу да дзяржавы. Перш чым выдзяляць грошы, эксперты глабальнай фінансавай карпарацыі вельмі ўважліва ацэньваюць усе эканамічныя паказчыкі. Дарэчы, у сярэдзіне студзеня Сусветны банк падаў абноўлены даклад. У ім палепшаны прагноз па беларускай эканоміцы.
Аналітыкі банка мяркуюць, што ў 2017 годзе ўнутраны нацпрадукт упадзе на 0,5 %. Раней называлася лічба 1 %. У 2018, паводле прагнозаў Сусветнага банка, эканоміка Беларусі прырасце на 1,3 %. Раней давалі толькі 0,3 %, а ў 2019 ВУП павялічыцца яшчэ на 1,4 %.
Драйвер росту - паляпшэнне знешняга асяроддзя. Таксама краіна адчуе першыя вынікі ад мер па павышэнні нацыянальнай канкурэнтаздольнасці.
Беларусь і Сусветны банк зараз вярстаюць новую стратэгію партнёрства на найбліжэйшыя 4 гады. Вядома, датацыі атрымаюць некалькі сфер: адукацыя, ЖКГ, медыцына. Дакладная сума інвестыцый у Палацы Незалежнасці не гучала. Але і сумнявацца ў намерах замежных партнёраў няма падставы. Апошнія гады Сусветны банк прыкметна павялічыў аб'ёмы падтрымкі. Ды і напярэдадні ў шматлікіх інтэрв'ю Кайл Пітэрс не раз заяўляў, што партфель праектаў у Беларусі рэалізуецца куды больш эфектыўна, чым у іншых краінах.
З кожным годам умацоўваючы ўзаемадзеянне, Сусветны банк адводзіць Беларусі вышэйшыя радкі ў сваіх рэйтынгах і дакладах. У той жа час паднімаемся ў іншых міжнародных топах. І гэта дзякуючы таму, у што інвестуем у першую чаргу - адукацыя, медыцына. Рэйтынг краін, спрыяльных для мацярынства, - Беларусь у топ-25. Лепшы вынік у СНД. Двухдзённы візіт топ-менеджменту Сусветнага банка ў Беларусь - шматгадзінныя, але галоўнае прадукцыйныя сустрэчы. На фінансавую падтрымку могуць разлічваць не толькі дзяржаўныя прадпрыемствы, але малы і сярэдні бізнес. Выпрацоўваецца новая стратэгія ўзаемаадносін Беларусі з Банкам да 2021 года. Яе, а таксама новыя праекты, абмяркуюць падчас найбліжэйшай сустрэчы з дэлегацыяй савета дырэктараў Банка.
