Напярэдадні ў Палацы Незалежнасці ўшаноўвалі ваенную эліту краіны

Вышэйшы афіцэрскі састаў і выдатнікі - выпускнікі ваенных ВНУ. Напярэдадні ў Палацы Незалежнасці ўшаноўвалі ваенную эліту краіны.

Асаблівы для Беларусі год 75-годдзя вызвалення ад нямецка-фашысцкіх захопнікаў назаўжды запомняць і гэтыя, сучасныя абаронцы Радзімы. Слаўныя традыцыі вялікага подзвігу герояў мінулага - гэта самы моцны стымул для тых, хто вырашыў прысвяціць сваё жыццё служэнню Айчыне. Тым больш, што выклікі сённяшняга дня пастаянна змяняюцца, з'яўляюцца новыя рызыкі і пагрозы. Таму і метады абароны нашых інтарэсаў заўсёды павінны быць на крок наперадзе. Словы Прэзідэнта сталі важным пажаданнем для тых, хто сёння ўзяў новую прафесійную вяршыню.

Самыя вопытныя вайскоўцы ўдастоіліся генеральскіх званняў. Высокая планка, вядома, прадугледжвае і самую высокую адказнасць. Зрэшты, гэта датычыцца і ўсіх гасцей. Такое ўшаноўванне людзей у форме паводле традыцыі праходзіць пасля галоўнага дзяржаўнага свята краіны - Дня Незалежнасці.

Так, удзельнікі цырымоніі прадстаўляюць розныя ведамствы, але ва ўсіх гэтых людзей галоўная мэта - абарона нацыянальных інтарэсаў. Кіраўнік дзяржавы пажадаў генералам з гонарам несці на плечах пагоны, афіцэрам жа - імкнуцца да дасягнення такіх вышынь.