Спорт - гэта не толькі здароўе нацыі, але і ідэалагічная праца, а значыць адзін з прыярытэтаў дзяржпалітыкі. З гэтых слоў Прэзідэнта пачалася вялікая нарада па развіцці зімовых відаў спорту. Маштабная размова ў Нацыянальным алімпійскім камітэце сабрала паўсотні чалавек. Спорту ў нашай краіне надаецца вялізная ўвага. Створана неабходная інфраструктура, у кожным рэгіёне ёсць лядовыя арэны, пабудавана некалькі трас, якія выкарыстоўваюць для лыжных гонак зімой, а летам для лыжаролераў. Дадзены даручэнні аб будаўніцтве ўсесезонных аб'ектаў для трэніровак у Раўбічах і Мінску. Дзяржава выдзяляе значныя сродкі на падрыхтоўку нацыянальных каманд да асноўных стартаў. За чатыры гады на фінансаванне зімовых відаў пайшло 10 з паловай мільёнаў долараў. Разам з тым мінулая Алімпіяда ў Карэі прынесла Беларусі толькі 3 медалі. Гэта вынік праблем у спартыўнай галіне.
Самымі медальнымі для беларусаў сярод зімовых відаў спорту з'яўляюцца біятлон і фрыстайл. Узнагарод з Карэі лятаючыя лыжнікі маглі б прывезці больш - тут ёсць пытанні да аб'ектыўнасці судзейства. Не менш іх у дачыненні да падыходаў трэнерскага штаба. Змаглі пайсці наперад у канькабежным спорце - маладыя атлеты тройчы траплялі ў васьмёрку наймацнейшых, але такі вынік Прэзідэнт лічыць недастатковым. Не бачна айчынных фігурыстаў, хоць у нас больш за тысячу займаюцца ў спартыўных школах. Не праглядваецца вынік у лыжных гонках. На гэтых праблемах зрабіў акцэнт Аляксандр Лукашэнка. Кіраўніцтву галіны і ў першую чаргу федэрацыям прэзідэнт адрасаваў галоўнае пытанне аб спартыўным рэзерве. Задача губернатараў - займацца пытаннямі спорту не менш, чым пасяўной - ствараць умовы для моладзі на месцах. Апроч дзіцяча-юнацкага спорту, нямала гаварылі аб важнасці трэнерскай працы.
Размова аб будучыні зімовых відаў атрымалася вельмі прынцыповай - абмяркоўвалі праблемныя пытанні беларускага спорту. Важна даць максімум магчымасцяў дзецям і іх бацькам для заняткаў фізічнай культурай. Неабходна стварыць эфектыўную сістэму выхавання атлетаў. Без гэтага не будзе поспехаў у спорце. Адну з прычын выяўленага негатыва ў спартыўнай галіне бачаць у тым, што профільнае міністэрства аслабіла рычагі кіравання. Мэтазгодна ў кожным відзе спорту, апроч праграм падрыхтоўкі да чарговых Алімпійскіх гульняў, мець канцэпцыю развіцця на 10-15 гадоў наперад. Гэта толькі частка тэм, якія абмяркоўваліся. Вялікі рэпартаж рыхтуюць журналісты Агенцтва тэленавін - глядзіце сёння ў "Панараме".
