Прэзідэнт Беларусі Аляксандр Лукашэнка павіншаваў калектыў Рэспубліканскага цэнтра алімпійскай падрыхтоўкі па зімовых відах спорту "Раўбічы" з 50-годдзем з дня адкрыцця спартыўнага комплексу. Пра гэта паведамляе БЕЛТА са спасылкай на прэс-службу беларускага лідара.
"За паўвекавую гісторыю на яго трасах і схілах вырасла цэлая плеяда вядомых атлетаў - пераможцаў і прызёраў Алімпійскіх гульняў, чэмпіянатаў свету і Еўропы. І зараз лепшыя беларускія трэнеры рыхтуюць годную змену нашым праслаўленым чэмпіёнам па зімовых відах спорту, выхоўваюць сапраўдных патрыётаў краіны", - адзначыў кіраўнік дзяржавы.
Аляксандр Лукашэнка звярнуў увагу, што сёння "Раўбічы" - суперсучасны шматфункцыянальны спартыўны і турыстычны аб'ект, шырока вядомы ва ўсім свеце. Тут на высокім арганізацыйным узроўні праходзяць найбуйнейшыя міжнародныя спаборніцтвы па біятлоне, лыжных гонках, фрыстайле.
Прэзідэнт падзякаваў працоўнаму калектыву, ветэранам і ўсім, хто ўнёс уклад у станаўленне і развіццё цэнтра, за адказнае стаўленне да справы і прафесіяналізм.
"Зычу моцнага здароўя, міру, дабра і новых вялікіх дасягненняў на славу Беларусі", - пажадаў кіраўнік дзяржавы.
