Сітуацыя на валютным рынку застаецца стабільнай. Гэта сёння паведаміў Прэзідэнту падчас рабочай сустрэчы кіраўнік Нацбанка Павел Калаўр.
Дзякуючы грашова-крэдытнай палітыцы апошніх гадоў удалося выйсці на раўнаважкі курс нацыянальнай валюты, які задавальняе экспарцёраў і стрымлівае інфляцыю. Таксама прадметам абмеркавання стала стварэнне спецыялізаванай арганізацыі па аказанні касава-інкасатарскіх паслуг. Ініцыятыва накіравана на аптымізацыю наяўнага грашовага абароту і пашырэнне сферы безнаяўных плацяжоў. Кіраўнік дзяржавы звярнуў увагу, што стварэнне новай структуры не павінна прывесці да росту выдаткаў у банкаўскай сферы.
Для беларускага рэгулятара мэта такога кроку - рацыянальнае выкарыстанне маёмасці і вызваленне Нацыянальнага банка ад неўласцівых функцый у галіне інкасацыі, перавозкі, апрацоўкі і захоўвання каштоўнасцяў. Будуць зніжаны выдаткі на ўтрыманне матэрыяльна-тэхнічных рэсурсаў, персаналу, скарочана колькасць спецаўтатранспарту і зброі ў абарачэнні краіны.
Долі ў статутным фондзе таварыства, якое ствараецца, размяркоўваюцца ў адпаведнасці з грашовымі і неграшовымі ўкладамі кожнага банка. За Нацбанкам 44 %, амаль палову - 49 % - уанясе Беларусбанк, Белаграпрамбанк - 7 %. Усяго статутны фонд складзе каля 120 мільёнаў рублёў.
Размеркаванне функцый цэнтрабанкаў - перадавая сусветная практыка. Паступовы адыход Нацбанка ад жорсткай цэнтралізацыі, акрамя відавочнай эканоміі, будзе спрыяць рэгуляванню патокаў наяўных грошай, павелічэнню хуткасці і павышэнню якасці апрацоўкі банкнот, а таксама высокай эканамічнай эфектыўнасці. Акрамя таго, Павел Калаўр падзяліўся з журналістамі планамі Нацбанка па нарошчванні золатавалютных рэзерваў і пацвердзіў інфармацыю, што рэгулятар бачыць магчымасць для зніжэння стаўкі рэфінансавання да 9,5- 10,5 % у гадавым выражэнні.
