Вялікія аграрныя задачы сёння гучалі ў Магілёўскай вобласці, а ў якасці прыкладаў - мясцовыя гаспадаркі. Кіраўнік дзяржавы ў пятніцу ажыццявіў рабочую паездку па рэгіёне. Зразумела, у разгар вяснова-палявых работ - гэта тэма нумар адзін. Тут жа Аляксандр Лукашэнка нагадаў аб задачах, якія напярэдадні былі пастаўленыя перад урадам, а вось сёння прагучалі, што называецца, на месцах: забяспечыць гаспадаркі тэхнікай і разгрузіць складскія запасы. Яшчэ адна вялікая тэма - малочна-таварныя комплексы. Наколькі глыбока мы навучыліся перапрацоўваць сыравіну? На гэта, наведваючы гаспадаркі, Прэзідэнт традыцыйна звяртае асаблівую ўвагу. Магілёўскія комплексы не сталі выключэннем. А вось, што называецца, з новага. Аляксандру Лукашэнку сёння паказалі, як тэхнікай у полі можна кіраваць з космасу - з дапамогай спецыяльнай спадарожнікавай сістэмы.
Усе падрабязнасці ў Сяргея Гусачэнкі. У саўгасе Дабраволец не баяцца смелых рашэнняў. Нібы апраўдваючы назву, гаспадарка першай у рэспубліцы ўзялася за кропкавае земляробства пры дапамозе спадарожніка і IT-тэхналогій. Унікальны вопыт зацікавіў і Кіраўніка дзяржавы. З наведвання саўгаса Аляксандр Лукашэнка і пачаў рабочую паездку ў Магілёўскую вобласць. Перш чым перайсці да тэхналогій 21 стагоддзя, Прэзідэнта інфармуюць аб ходзе пасяўной. Сітуацыя ў рэгіёнах розная. Калі ў Гомельскай сяўба ярыны завершана, то Брэсцкая і Віцебская пакуль адстаюць. Адна з прычын - недахоп азотных угнаенняў. Ёсць прапанова закупіць у суседзяў, аднак Прэзідэнт катэгарычна супраць. Асаблівы акцэнт Кіраўніка дзяржавы - на забяспечанасць аграрыяў тэхнікай. Гаспадаркі, якія адчуваюць у ёй недахоп, могуць папоўніць свой парк і дапамагчы прадпрыемствам паменшыць складскія запасы. Адпаведнае распараджэнне Прэзідэнт даў ураду. Дыктатура тэхналагічнай дысцыпліны павінна стаць вызначальнай у працы аграрыяў, заяўляе Прэзідэнт, калі размова заходзіць аб укараненні інфармацыйных тэхналогій. Камп'ютар не заменіць працу спецыяліста, але здольны павысіць культуру апрацоўкі і яе эфектыўнасць. Менавіта такі прыклад і дэманструюць у Дабравольцы. Пры дапамозе касмічных тэхналогій для кожнага поля тут падбіраюць індывідуальную праграму - колькі ўносіць угнаенняў і чым засеяць, каб атрымаць максімальную выгаду. Кропкавая тэхналогія дазволіць павысіць ураджайнасць да 9% і сэканоміць угнаенняў на чвэрць. Прэзідэнту дэманструюць тэхніку, аснашчаную спецыяльным абсталяваннем: праграму распрацавалі ў Беларусі, укладанні акупяцца праз некалькі гадоў. Прэзідэнт цікавіцца меркаваннем спецыялістаў.
Праект рэалізуецца толькі другі год. І галоўны паказчык - цяперашняя ўборачная. Тады і будуць зробленыя высновы, падагульніў Кіраўнік дзяржавы. Яшчэ адзін крок да прагрэсу ў аграрным сектары - сістэма GPS, якая дазваляе адсачыць працу тэхнікі на працягу ўсяго рабочага часу. Высокія тэхналогіі, новая тэхніка - усе крокі ў напрамку, які вядзе да павышэння канкурэнтаздольнасці. Кропкавае земляробства, якое ўкараняюць у гэтай гаспадарцы, абяцае знізіць выдаткі на вытворчасць прадукцыі, а значыць павысіць канкурэнтаздольнасць. Фактычна насупраць і яшчэ адзін важны аб'ект гаспадаркі: малочна-таварная ферма Дуброва. Тут гаварылі пра развіццё галоўнага экспарцёра ў аграрнай сферы - малочнай галіны. Каб канкурыраваць на рынках, Беларусь ідзе па шляху ўзбуйнення прадпрыемстваў: стварэнне холдынгаў, паводле задумкі, дазволіць вырабляць больш, траціць на гэта менш, больш эфектыўна выкарыстоўваць працоўныя і сыравінныя рэсурсы.
Ігар Кананчук сёння ў прыўзнятым настроі: яго прадпрыемства стала холдынгам восенню мінулага года. Справы ідуць у гару: брэнд вядомы, экспартныя цэны выраслі, а прадукцыя на складах не залежваецца. Кожны месяц толькі па перадаплаце кампанія атрымлівае каля 5 мільёнаў долараў: на экспарт ідзе 70% малочных прадуктаў.
Выкананне даручэння па стварэнні малочных холдынгаў разглядалі як раз на прыкладзе магілёўскай кампаніі. У яе складзе - 16 перапрацоўчых прадпрыемстваў, а сыравінная зона - амаль у кожным раёне вобласці. Гэта 80% усяго магілёўскага малака. На развіцці менавіта сыравінных зон і робіць акцэнт Кіраўнік дзяржавы. Прадпрыемства без малака - гэта куча металу. Магутнасці холдынгу дазваляюць штогод перапрацоўваць 1 мільён тон малака. Буйныя кампаніі з'явіліся і ў іншых рэгіёнах Беларусі. На думку Прэзідэнта, стварэнне холдынгаў сябе апраўдала. Аднак у пытаннях экспарту нельга дапусціць залішняй канкурэнцыі з холдынгамі з іншых рэгіёнаў. Што тычыцца сыравінных зон, Прэзідэнту дакладваюць аб эфектыўнасці працы малочна-таварных комплексаў, пабудаваных у адпаведнасці з указам. Такіх аб'ектаў 118: рэнтабельнасць добрая, але ўсюды розная. Наступны крок у мадэрнізацыі адной з ключавых галін АПК - рэканструкцыя ўжо дзеючых аб'ектаў: у Беларусі павінна з'явіцца 1200 сучасных комплексаў. Адным з аб'ектаў па вытворчасці якаснага малака неўзабаве стане і гэтая ферма. Новы аб'ект у калгасе імя Леніна прыйдзе на змену старому, пабудаванаму яшчэ ў 80-м. Узводзіцца комплекс за сродкі самога прадпрыемства, ужо выдаткавана звыш 5 мільярдаў рублёў, ільготнага крэдыту і пазыкі - гэта яшчэ 15. Жалезабетонныя канструкцыі тут замяняюць драўляныя. На думку губернатара Магілёўскай вобласці, так больш практычна і танна. А сам аб'ект называюць модулем: даільная зала і два корпусы - гэта яшчэ не комплекс, але ўжо паўнавартасная ферма: астатняе дабудуюць у працэсе. Падыходамі да рэканструкцыі Прэзідэнт застаўся задаволены. Да канца года ў рэгіёне з'явіцца яшчэ 100 падобных аб'ектаў. Ператварэнне фермаў у комплексы ў 2015 дасць Беларусі 10 мільёнаў тон малака і знізіць выдаткі на яго вытворчасць амаль на траціну. Пры гэтым аддачу ад інвестыцый, па мерках бізнесу, можна назваць маментальнай. Шматлікія комплексы акупяцца ўсяго за тры гады. Рост вытворчасці дазволіць патанніць прадукцыю, што дасць магчымасць больш паспяхова канкурыраваць з пастаўшчыкамі з Еўропы і Новай Зеландыі. Сёння Беларусь уваходзіць у пяцёрку сусветных лідараў па экспарце малочнай прадукцыі. Зрэшты, спачываць на лаўрах - выпусціць ключавыя нішы на рынку. Не спрашчацца і выкарыстоўваць прагрэсіўныя тэхналогіі, мабыць, галоўнае патрабаванне Прэзідэнта да аграрыяў. Прынцып мы не настолькі багатыя, каб купляць танныя тэхналогіі ў малочнай галіне сёння вызначальны. Дысцыпліна і ашчаднасць - яшчэ адзін крок да вытворчай культуры. Менавіта ад яе, на думку Прэзідэнта, залежыць і якасць, і аб'ёмы прадукцыі. Зрэшты, імкненне да лепшага прыкметна і ў жыцці аграгарадка Арэхаўка. На ўездзе незвычайны сад камянёў, а ў цэнтры вадаём, які зноў аблюбавалі лебедзі. А гэта значыць, што не толькі да працы ў Клічаўскім раёне навучыліся ставіцца з душой.
