Борт нумар адзін вылецеў з Нацыянальнага аэрапорта Мінск у Катар

29 Кастрычніка 2016

Прэзідэнт Беларусі сёння накіраваўся з візітам у краіны Блізкаўсходняга рэгіёна.

Некалькі гадзін таму борт нумар адзін вылецеў з Нацыянальнага аэрапорта Мінск. Самалёт Кіраўніка дзяржавы ўзяў курс на Катар - гэту краіну ў Персідскім заліве Аляксандр Лукашэнка наведае першай. Час шляху паміж Мінскам і Дохай прыкладна пяць гадзін.

Падчас афіцыйнага візіту ў Катар Аляксандр Лукашэнка правядзе перамовы з эмірам краіны шэйхам Тамімам бен Хамадам аль-Тані. Па выніках сустрэчы чакаецца падпісанне шэрагу двухбаковых дакументаў. Сярод іх пагаднення аб супрацоўніцтве ў фінансах і ахове здароўя. Сярод арабскіх дзяржаў Блізкага Усходу Катар - найбуйнейшы інвестар у беларускую эканоміку. Зараз краіны прапрацоўваюць магчымасць паставак на гэты рынак БелАЗаў і грузавікоў МАЗ. Тут яны спатрэбяцца ў сферы будаўніцтва. Праз 6 гадоў Доха прыме чэмпіянат свету па футболе. Да мундыялю ўзводзяць шмат спартыўных і інфраструктурных аб'ектаў, будуюць дарогі і нават метро. Мае патрэбу Катар і ў якасных аддзелачных матэрыялах.

Са сталіцы Катара Прэзідэнт Беларусі накіруецца з рабочым візітам у Аб'яднаныя Арабскія Эміраты. Плануецца, што Аляксандр Лукашэнка сустрэнецца са спадчынным прынцам Абу-Дабі, намеснікам вярхоўнага галоўнакамандуючага Узброенымі сіламі Эміратаў шэйхам Мухамедам бен Заідам аль-Нахаянам, а таксама з віцэ-прэзідэнтам, прэм'ер-міністрам і міністрам абароны, кіраўніком эмірата Дубай шэйхам Мухамедам бен Рашыдам аль-Мактумам. На сустрэчах абмяркуюць перспектывы развіцця двухбаковага супрацоўніцтва, рэалізацыю сумесных праектаў.