Аб гэтым напярэдадні заявіў Аляксандр Лукашэнка на перамовах са сваім калегам з гэтай афрыканскай рэспублікі. У Палацы Незалежнасці напярэдадні прымалі Прэзідэнта Зімбабвэ. Гэта першы ў гісторыі двухбаковых адносін афіцыйны візіт на вышэйшым узроўні. На поўначы Афрыканскага кантынента супрацоўнічаем з Егіптам і Алжырам, у цэнтральнай частцы кантынента - з Суданам. У інтарэсах - наладзіць больш цесныя кантакты ў Паўднёвай Афрыцы. І ў Зімбабвэ бачым вялікі фронт працы, адзначыў Кіраўнік беларускай дзяржавы.
Асабісты дыялог дзеючых кіраўнікоў дзяржаў другі па ліку. 4 гады таму лідары ўжо сустракаліся, але тады высокі госць займаў пасаду першага віцэ-прэзідэнта. Тыя перамовы далі пэўны штуршок развіццю нашых адносін. Амаль два дзесяцігоддзі краіны гандлявалі ў межах 2-5 мільёнаў долараў. Тавараабарот 2017 года ўжо перасягнуў адзнаку 20. Пэўныя чаканні і на цяперашнія перамовы.
Зімбабвэ яшчэ часта называюць домам вялікіх камянёў. У нетрах афрыканскай рэспублікі вялізная колькасць карысных выкапняў. І, дарэчы, там ужо працуюць нашы БелАЗы. На новым этапе супрацоўніцтва прапаноўваем сумесныя праекты ў энергетыцы, сельскай гаспадарцы, лагістыцы, разведцы і здабычы карысных выкапняў.
Па выніках перамоў у вузкім і пашыраным саставах бакі падпісалі пакет міжнародных дакументаў. Так, Беларусь і Зімбабвэ дамовіліся аб больш цесным партнёрстве паміж знешнепалітычнымі, сельскагаспадарчымі ведамствамі і міністэрствамі адукацыі. Больш актыўна бакі будуць супрацоўнічаць у галіне навукі і інавацый.
Сумесным праектам неабходныя прамыя кантакты і наладжаныя камунікацыі, гэта значыць далучацца да двухбаковага супрацоўніцтва павінны і дзелавыя колы, адзначыў беларускі лідар. Сустрэчы з бізнесам напярэдадні прайшлі пры ўдзеле Прэзідэнта афрыканскай дзяржавы. Актывізаваць партнёрства накіравана і консульства Зімбабвэ, якое ўжо расчыніла свае дзверы.
Сёння афіцыйны візіт Прэзідэнта Зімбабвэ завершыцца. Але перш чым пакінуць нашу краіну, кіраўнік паўднёваафрыканскай дзяржавы пазнаёміцца бліжэй з беларускай культурнай і прыроднай спадчынай. У праграме - наведванне Белавежскай пушчы. Яна нікога не пакідае абыякавым. Думаем, яркія ўражанні застануцца і ў нашага афрыканскага госця.
