Гэта вынікае з сумеснай заявы прэзідэнтаў Аляксандра Лукашэнкі і Чан Дай Куанга аб усебаковым і паглыбленым развіцці адносін партнёрства паміж дзвюма краінамі. Дакумент падпісаны па выніках афіцыйных перамоў у Палацы Незалежнасці.
У ім пацвярджаецца курс на паслядоўнае развіццё і ўмацаванне традыцыйна дружалюбных сувязяў паміж Беларуссю і В'етнамам. Заяўлена аб супольнасці падыходаў да ключавых глабальных і рэгіянальных праблем і выяўлена гатоўнасць да цеснага супрацоўніцтва ў рамках міжнародных арганізацый. Бакі выказалі задавальненне канструктыўным характарам і дынамічным паступальным развіццём беларуска-в'етнамскага супрацоўніцтва.
Чан Дай Куанг, Прэзідэнт В'етнама:
"У В'етнама і Беларусі традыцыйна дружалюбныя адносіны, ёсць вялізны патэнцыял для развіцця супрацоўніцтва ў шматлікіх сферах. Я жадаю заявіць аб жаданні і рашучасці кіраўніцтва і народа В'етнама ўмацоўваць эфектыўнае супрацоўніцтва з Беларуссю ў інтарэсах абодвух бакоў".
Аб пэўных праектах гаворка ішла сёння на перамовах у пашыраным фармаце з удзелам прадстаўнікоў профільных ведамстваў дзвюх краін. У прыватнасці, прэзідэнты адобрылі стварэнне Беларуска-в'етнамскага сумеснага прадпрыемства MAZ Asia па зборцы беларускай грузавой аўтатэхнікі на тэрыторыі В'етнама. Рэалізацыя кааперацыйных праектаў дазволіць лакалізаваць вытворчасць у В'етнаме беларускай складана-тэхнічнай прадукцыі, у тым ліку для наступнага сумеснага экспарту тэхнікі ў краіны - члены Асацыяцыі дзяржаў Паўднёва-Усходняй Азіі. Бакі маюць намер развіваць і паглыбляць кааперацыю ў галінах транспартнага машынабудавання і сельскай гаспадаркі, нафтахіміі і лёгкай прамысловасці, інфармацыйных і банкаўскіх тэхналогій, а таксама электронікі, здабычы карысных выкапняў і ў іншых галінах эканомікі.
У прысутнасці лідараў дзвюх краін падпісана 10 міжнародных дакументаў. Чан Дай Куанг запрасіў Аляксандра Лукашэнку наведаць В'етнам у зручны для яго час. Запрашэнне з падзякай прынята. Пэўныя тэрміны візіту яшчэ будуць узгодненыя. Прытрымліваючыся традыцыі, лідары дзвюх краін пасадзілі дрэва на Алеі ганаровых гасцей ля Палаца Незалежнасці.
У гэтыя хвіліны ў Палацы Рэспублікі стартуе беларуска-в'етнамскі бізнес-форум. У цырымоніі адкрыцця прымуць удзел кіраўнікі дзвюх дзяржаў.
