Аляксандр Лукашэнка наведаў вёску спартсменаў у Мінску

Зусім нямнога часу застаецца да старту ІІ Еўрапейскіх гульняў! Маштабны спартыўны форум адкрыецца 21 чэрвеня. Але першыя спартсмены і дэлегацыі пачнуць прыбываць ужо ў пачатку наступнага месяца. Да прыёму замежных гасцей амаль усё гатова. Падзея сапраўды іміджавая для Беларусі. І ад таго, як усё будзе арганізавана, пачынаючы з дробязяў і сканчаючы глабальна якасцю правядзення форуму,  залежыць, якое  ўражанне будзе і ў цэлым аб Беларусі. Усе дэталі падрыхтоўкі да кантынентальных спаборніцтваў Кіраўнік дзяржавы кантралюе асабіста. Сёння Аляксандр Лукашэнка наведаў вёску спартсменаў у Мінску. Менавіта яна стане вялікай штаб-кватэрай  для атлетаў, кіраўнікоў дэлегацый і менеджараў. А пасля - паўнавартаснай студэнцкай вёскай. Пакуль жа ўсе студэнты забяспечаныя месцамі ў іншых інтэрнатах. А гэтыя цалкам гатовыя сустракаць гасцей. З падрабязнасцямі - Ілона Красуцкая.

Наваколлі праспекта Дзяржынскага ў Мінску падчас ІІ Еўрапейскіх гульняў стануць самымі спартыўнымі. Тут знаходзіцца комплекс інтэрнатаў, які больш вядомы ўсім як студэнцкая вёска. Але на час спаборніцтваў яна стане вёскай спартсменаў. Як гэта было і падчас чэмпіянату свету па хакеі ў 2014, інтэрнаты ўжо пераабсталяваныя пад гасцініцы для ўдзельнікаў спаборніцтваў і дэлегацый. 

Андрэй Палавінкін, менеджар вёскі спартсменаў фонду "Дырэкцыя II Еўрапейскіх гульняў 2019 года": "Усяго для размяшчэння ўдзельнікаў Еўрапейскіх гульняў будзе задзейнічана 9 інтэрнатаў. З іх 7 функцыянавалі да Еўрапейскіх гульняў, дзе размяшчаліся студэнты ўніверсітэтаў. Два інтэрнаты - новыя. Адзін інтэрнат на 25 паверхаў на 1800 месцаў - гэта інтэрнат зараз БДЭУ, і другі новы інтэрнат - гэта інтэрнат, пабудаваны за сродкі Кітайскай Народнай Рэспублікі". 

Студэнты ж выказалі сваю гасціннасць - на час пераехалі ў іншыя інтэрнаты. Прыйшлося паставіцца з разуменнем, усё ж спаборніцтвы такога ўзроўню бываюць нячаста! Ды і навучальны план склалі такім чынам, што да пачатку спаборніцтваў студэнты пойдуць на канікулы. Бо частка з іх стане непасрэднымі ўдзельнікамі спартыўнага шоу - валанцёрамі. На гэтым аб'екце задзейнічаюць 700 чалавек для суправаджэння дэлегацый і працы ў самой вёсцы. 

Інфраструктура комплексу прадуманая да дробязяў. Арганізатары стварылі горад у горадзе. На тэрыторыі вёскі ёсць магазіны, цэнтр беларускай культуры і, вядома ж, спартыўныя аб'екты! 

Афіцыйнае адкрыццё запланаванае на 18 чэрвеня, але спартсмены і ўдзельнікі дэлегацый: трэнеры, менеджары - пачнуць засяляцца на тры дні раней. Падрыхтаваныя амаль 7 000 месцаў. Тут будуць пражываць 50 каманд. Самая шматлікая - з Расіі - размесціцца побач з нашай зборнай, а самая кампактная - з Ліхтэнштэйна. У веданні кожнай каманды офіс кіраўніка дэлегацыі, неабходная колькасць жылых пакояў, медыцынскіх блокаў. Усе памяшканні адрамантаваныя, з'явілася новая мэбля. Як правіла, спартсмены зборных па веславанні і веласпорце высокага росту, гэты нюанс таксама ўлічылі арганізатары.

Усе дэталі падрыхтоўкі маштабнага спартыўнага форуму Кіраўнік дзяржавы і прэзідэнт Нацыянальнага алімпійскага камітэта трымае на асабістым кантролі. Аляксандр Лукашэнка першапачаткова быў азнаёмлены з усімі нюансамі, ад выбару формы для нацыянальнай зборнай да частых сустрэч з функцыянерамі Еўрапейскіх алімпійскіх камітэтаў і цэлай серыі тэматычных нарад у Мінску. Задачы ўсім добра вядомыя - мерапрыемства для краіны іміджавае. Як правядзем мультыкультурны форум, такое ўражанне і складзецца аб Беларусі. Размова і аб элементарных рэчах: усмешцы валанцёраў, аператыўнасці рашэнняў нейкіх бытавых пытанняў і парадку.

Пасля завяршэння форуму ўсе бонусы ў выглядзе свежага рамонту, прасторнага размяшчэння і новай мэблі дастануцца дзесяці тысячам маладых беларусаў. Менавіта столькі студэнтаў будуць пражываць на тэрыторыі комплексу. Радуе і інфраструктура побач. Ёсць метро, магазіны, кафэ, стадыён, спарткомплекс па фігурным катанні. Гледзячы на гэтыя кадры, кожны былы студэнт зайздросціць цяперашнім па-добраму. Сапраўдныя цяплічныя ўмовы - ёсць цалкам усё! Словам, толькі вучыся і паказвай годны вынік. 

Пакуль можна вольна прагуляцца каля будучых апартаментаў спартсменаў, але ўжо ў гэты панядзелак уваход на тэрыторыю комплексу абмяжуюць. Трапіць у спартыўны гарадок можна будзе толькі па акрэдытацыі. Зроблена гэта ў першую чаргу дзеля бяспекі. Спакой і парадак на тэрыторыі не будуць лішнімі і студэнтам, якія будуць жыць тут пасля спартыўнага форуму. 

А гэта будучы пункт харчавання спартсменаў. Адначасова тут могуць размясціцца 2 тысячы чалавек. Кожны дзень спартыўным дэлегацыям будзе прапанавана як мінімум 250 розных страў, прыгатаваных з беларускіх прадуктаў. Наша здымачная група ўжо даведалася меню атлетаў. 

Усё ж накарміць 4 тысячы спартсменаў, а менавіта столькі прыедуць на II Еўрапейскія гульні, задача не з простых, але вырашальная. На абслугоўванні аб'екта, які будзе працаваць 24 гадзіны, задзейнічаюць каля 650 супрацоўнікаў. І палова з іх - лепшыя кухары краіны. 

Не толькі рыхтаваць, але і будаваць, і вырабляць са свайго,  беларускага,  павінны самі: ад сталоў да абсталявання і матэрыялаў. Вось так выглядае посуд, які будуць выкарыстоўваць падчас Гульняў. Аднаразовая, вядома, зручна і хутка. Не трэба марнаваць час, мыць. Але краіна ўзяла экакурс: паступова адыходзім ад ужывання пластыка, вучымся не ленавацца - сартуем смецце і больш актыўна выкарыстоўваем у вытворчасці другасную сыравіну.

Першапачаткова ў студэнцкай вёсцы планавалі размясціць часовы павільён харчавання, але знайшлі рацыянальнае рашэнне - прыбудавалі памяшканне да лядовай арэны. Гэты пункт харчавання пасля форуму пераабсталююць ва ўніверсальную спартзалу. Такое ж рацыянальнае і беражлівае выкарыстанне тычыцца любых рэчаў, куды дзяржава ўклала немалыя сродкі. 

Міністр адукацыі Ігар Карпенка і супрацоўнікі апарата міністэрства ўдзельнічалі ў падрыхтоўцы гэтых гасцініц і добраўпарадкаванні тэрыторыі вёскі атлетаў падчас рэспубліканскага суботніка. Пакінуць тэрыторыю ў такім жа парадку і зрабіць яе яшчэ больш прыгожай - да гэтага падключыцца павінны і будучыя навасельцы комплексу. Чысціня стала паняццем намінальным пры згадванні Беларусі, але, як гаворыцца, няма мяжы дасканаласці. 

Мінск у гэты час ужо тоне ў зеляніне. Атмасфера на тэрыторыі сапраўды адпавядае слогану Еўрапейскіх гульняў: Bright you - ты яркі! Такімі жа яркімі павінны застацца ўражанні ад краіны ў гасцей і ўдзельнікаў кантынентальных спаборніцтваў. Функцыяналам вёскі атлетаў Прэзідэнт застаўся задаволены. Яе начынне стане своеасаблівым падарункам і для іншых устаноў краіны пасля таго, як форум завершыцца. 

II Еўрапейскія гульні пройдуць у Мінску на 12 спартыўных аб'ектах. Звыш 4 тысяч атлетаў з 50 краін разыграюць 199 камплектаў узнагарод у 15 відах спорту. Спаборніцтвы ў 8 відах стануць кваліфікацыйнымі да Алімпійскіх гульняў у Токіа ў наступным годзе. А спаборніцтвы па бадмінтоне, боксе і дзюдо пройдуць у рангу чэмпіянатаў Еўропы. Чакаем у госці тысячы балельшчыкаў. Часта сустракаючыся з кіраўнікамі дзяржаў, топавымі палітыкамі, наш Прэзідэнт запрашае іх у Мінск наведаць спартыўны форум. Пры гэтым мы не замахваемся на залішнюю пампезнасць. Пакажам свае лепшыя якасці ва ўсім: ветлівасць, гасціннасць і душэўнасць. У наш час мала каго здзівіш пафасам, бо такая рэдкасць прыгажосць у прастаце. Ствараем свята, настрой, рады гасцям і разам пішам спартыўную гісторыю Еўропы.