А.Лукашэнка вайскоўцам: Зрабіце ўсё магчымае, каб абараніць суверэнітэт і гарантаваць бяспеку

Пра тых, хто на варце бяспекі сёння. Падчас наведвання Брэста Аляксандр Лукашэнка пабываў у 38-й асобнай гвардзейскай дэсантна-штурмавой брыгадзе. Гэта была адкрытая размова з элітай Узброеных сіл аб нацыянальнай бяспецы, пераўзбраенні арміі і падзеях на планеце. Чырвонай ніткай адна важная думка - давайце зробім усё, каб захаваць суверэнітэт і мір на нашай зямлі.  Са свайго боку дзяржава прыкладзе максімум намаганняў, каб павысіць прэстыж ваеннай службы. Крок за крокам будавалі надзейны шчыт бяспекі, які сёння працуе. Чаго гэта варта -  распавядзе Наталля Брэвус.

А.Лукашэнка служыў у Брэсцкім пагранатрадзе 

"Брэст мне не чужы" - не раз скажа Прэзідэнт. І прызнаецца,  што менавіта тут прайшлі няпростыя гады яго жыцця. Аляксандр Лукашэнка служыў у Брэсцкім пагранатрадзе. Ёсць што ўспомніць. Але сёння размова з людзьмі ў пагонах не з разраду ўспамінаў -  пра рэаліі цяперашніх дзён.
Прэзідэнт не мог да іх не заехаць. 38-я дэсантна-штурмавая брыгада - пераемніца 105-й гвардзейскай стралковай дывізіі, якая была створана ў гады Вялікай Айчыннай. Але з тых часоў столькі вады выцекла,  таму з парога Галоўнакамандуючы  пра гатоўнасць да канфліктаў XXI стагоддзя. 

А. Лукашэнка ў Брэсце сустрэўся з дэсантнікамі 

Цяжка  ў вучэнні - лёгка ў баі, не дай бог, вядома. Мабільнасць, вынослівасць, гатоўнасць да выканання любых задач - усё гэта пра байцоў брыгады. Невыпадкова дэвіз дэсантнікаў гучыць проста: ніхто акрамя нас!
Адпрацоўка скачкоў з парашутам на зямлі,  цяжкія трэніроўкі, інструктаж - падрыхтоўка ідзе нон-стоп. Усе дзеянні даводзяць да аўтаматызму. Нездарма жартуюць:  каб адчуць сябе арлом у паветры, спачатку трэба добра папацець на зямлі.
Горкія ўрокі вайны не прайшлі дарэмна для Беларусі. Апошнія 2 дзясяткі гадоў цаглінка за цаглінкай будуем сваю нацыянальную бяспеку. У той час, калі ў розных кутках планеты  шугае або тлее полымя канфліктаў, Беларусі ўдалося ісці па суверэнным шляху без рознагалоссяў. 

А. Лукашэнка: У аснове заўсёды ляжыць  вельмі жорсткая канкурэнцыя 

Размова з афіцэрскім складам была адкрытай. Гэтыя загартаваныя людзі ўмеюць захоўваць не толькі ваенную таямніцу.  Зрэшты, утойваць Прэзідэнту няма чаго - усё сусветнае становішча як на далоні  ў наша інфармацыйнае стагоддзе. У Беларусі таксама не заплюшчвалі  на гэта вочы. Рэакцыяй на выклікі часу -  гібрыдныя войны, калі і інфармацыйны штык  б'е  балюча -  стала новая ваенная  дактрына.  
Дарэчы,  далёка па прыклад хадзіць не трэба. Штодзённыя ўкіды ў сацыяльных сетках або тэлеграм-каналах  прымусяць пахвалявацца, а ці ўсё ў нас добра з эпідсітуацыяй? А гэта ўсе тыя самыя сучасныя тэхналогіі і маніпуляцыі ў справе, калі спрабуюць падарваць давер. І гэта вытрымалі!

У Беларусі эфектыўна функцыянуе сістэма гарантавання нацыянальнай бяспекі 

Ад эканомікі ідзе ўсё жыццё. Ёсць сродкі - можна разлічваць на развіццё, на ўнёсак у тую самую бяспеку. Вядома, шматмільярдныя ваенныя бюджэты некаторых сусветных гульцоў уражваюць. У Беларусі гэта не па кішэні і не трэба. Але зрабіць так, каб урон праціўніку ў выпадку чаго быў нанесены непрымальны,  дакладна па сілах. 

Аб павышэнні прэстыжу ваеннай службы: мы будзем рабіць для гэтага ўсё 

Дарэчы, зроблена нямала, каб прывесці ў парадак ваенныя гарадкі. Тыл павінен быць надзейным. Як уладкаваны побыт вайскоўцаў у 38-й брыгадзе, паказваюць Прэзідэнту  - ад спартыўнай і трэнажорнай залы да казармаў. Адну з іх як раз абнавілі, капітальна адрамантавалі. База -  гэта добра,  важна,  і на якім матрацы спаць, і што ў рацыёне вайскоўцаў. Але яшчэ больш важны  прэстыж ваеннай службы. 

Звяртаючыся да афіцэраў аднаго з самых лепшых і баяздольных злучэнняў,  Галоўнакамандуючы назаве іх ваеннай элітай

Гэта не проста гучныя словы - яны кожны дзень на баявым пасту, на варце спакою кожнага з нас.  Добрасумленна з дня на дзень нясуць нялёгкую службу  - званне  абаронца абавязвае. Г.з. заклік лідара просты - давайце захаваем усё тое, што ў нас ёсць сёння.  Вось такія задачы на будні. Што датычыцца свят, то і ў людзей у пагонах яны бываюць.  Сёлета ў блакітных берэтаў  юбілейная дата. У жніўні  90 гадоў  паветрана-дэсантным войскам і сілам спецыяльных аперацый  нашай краіны. Галоўнакамандуючага чакаюць.