І яшчэ аб сяброўстве, толькі апраўленым у рамкі Саюзнай дзяржавы. На тыдні ў Магілёве адбыўся Савет Міністраў Расіі і Беларусі - 45-ы па ліку. Тое, што Магілёў, - не выпадкова. Па-першае, беларускі прэм'ер выконваў дадзенае яшчэ летась у Гродне свайму расійскаму калегу Дзмітрыю Мядзведзеву абяцанне - пазнаёміць яго з патэнцыялам усіх беларускіх абласных цэнтраў. Па-другое, Магілёў - знакавы горад у гісторыі Беларусі і Расіі.
Прычым, знакавы па запэўненні Андрэя Кабякова не толькі з пункта погляду гістарычных падзей. На сённяшні дзень горад Магілёў з'яўляецца адным з флагманаў беларуска-расійскага супрацоўніцтва: па колькасці праектаў, прычым, як з беларускага, так і расійскага боку. На такім пазітыўным бэкграўндзе горада прасцей дамаўляцца і строіць планы. Мабыць, удалося. У шчыльным парадку сустрэчы - 27 пытанняў. Галоўны блок - гандлёва-эканамічнае супрацоўніцтва. З аналізам і перспектывамі.
Упершыню з 2009 года вырашылі вярнуцца да выпрацоўкі сярэднетэрміновага прагнозу развіцця Саюзнай дзяржавы, а значыць, звяраць эканамічныя гадзінннікі будуць часцей. І сказалі важнае: Беларусь і Расія могуць аднавіць дакрызісныя аб'ёмы двухбаковага тавараабароту. Пры тым, што застаецца нявырашаным шэраг пытанняў, звязаных з "доступам тавараў, прац і паслуг" на рынкі нашых краін, магчымасцяў для свабоднай і роўнай канкурэнцыі, і ўзгодненай эканамічнай палітыкі досыць.
Дарэчы, гэты Савет Міністраў можна з абмоўкай назваць тэхналагічнай нарадай. На ім былі прапанаваныя канцэпцыі праграм у сферы нанатэхналогій, сістэм бяспекі, медыцынскіх распрацовак, космасу, электронікі. Яшчэ адна знакавая заўвага прагучала ў заяве двух прэм'ераў: нягледзячы на складанасці ў эканоміцы, важныя праграмы, напрыклад, такая, як Чарнобыльская саюзная праграма, атрымаюць дадатковыя субсідыі.
Успомнілі і аб агульнай гістарычнай памяці. Андрэй Кабякоў і Дзмітрый Мядзведзеў у суправаджэнні сваіх дэлегацый наведалі "Буйніцкае поле" - мемарыяльны комплекс і капліцу, збудаваныя ў памяць аб савецкіх воінах і народных апалчэнцах, якія загінулі пры абароне Магілёва.
