Падрабязнасці размовы ў Прэзідэнта даведаемся ў нашага аглядальніка Наталлі Брэвус.
"І зноў нафта", - менавіта з такімі каментарыямі журналісцкі пул рыхтаваўся да нарады. Пастаўкі і перапрацоўку чорнага золата абмяркоўваюць за апошнія месяцы не ўпершыню. Але вось кадравых рашэнняў у гэты дзень ніхто не чакаў, а яны здарыліся.
Прэзідэнт прызначыў Юрыя Назарава намеснікам прэм'ер-міністра
Пасада віцэ-прэм'ера для Юрыя Назарава - павышэнне. Дагэтуль ён амаль 6 гадоў працаваў на чале не самага простага канцэрна - "Беллеспаперапрам". На гэты час прыпаў звышнапружаны перыяд мадэрнізацыі дрэваапрацоўкі. Не ўздыхнеш свабодна! Новая праца (а трэба будзе курыраваць ва ўрадзе нафтахімічны комплекс) не прасцей. Уключыцца прыйшлося імгненна. З кабінета Прэзідэнта новы віцэ-прэм'ер накіраваўся на нараду. Шчырая размова. Рэаліі нашага часу такія, што менавіта "вуглевадародны рычаг" становіцца магутным аргументам у палітычных і эканамічных пытаннях. Адчулі гэта на сабе.
Прэзідэнт пра "вуглевадародны рычаг"
Хаця і ёсць міжурадавае пагадненне з Расіяй, згодна з якім Беларусь павінна атрымаць прыкладна 24 мільёны тон нафты, але яно, на жаль, не выконваецца. Гэта значыць нягледзячы на складанасці прадпрыемствы працуюць, праблем з палівам у краіне няма. Але з улікам таго, што нафтаперапрацоўка дае важкі дадатак ВУП, любыя праблемы тут адбіваюцца на эканоміцы. І вось каб у будучыні не было так балюча, звышзадача ўрада думаць глабальна над дыверсіфікацыяй крыніц эканамічнага росту, а пакуль азадачаны канкрэтна нафтай. Альтэрнатыва па сыравіне на рынку ёсць. Галоўнае не зацыклівацца.Пра альтэрнатыўныя крыніцы сыравіны
Як гаворыцца, не было б шчасця, ды няшчасце дапамагло. Няпросты перагаворны працэс з расійскімі партнёрамі прымусіў па-новаму зірнуць на сусветных пастаўшчыкоў чорнага золата ў самых розных краінах. Альтэрнатыва – залог энергетычнай бяспекі. Урад заварушыўся. Была закуплена нарвежская нафта. Ад расійскіх вуглевадародаў не адмаўляемся. У літоўскай Клайпедзе чакаем і тыя, што былі набыты праз трэйдараў без прэміі. Ад Азербайджана сёлета чакаем да мільёна тон нафты. Напярэдадні ва ўрадзе прайшлі перамовы з кіраўніком найбуйнейшай азербайджанскай нафтавай кампаніі SOCAR. Яна плануе адправіць першы танкер для Беларусі з турэцкага порта праз некалькі дзён. Вопыт супрацоўніцтва з кампаніяй ужо ёсць. Размова і пра тое, каб падключаць надзейных пастаўшчыкоў сыравіны ў інфраструктурныя праекты. Чаму не? Ну і, вядома, на парадку дня найважнейшы аспект - лагістыка альтэрнатыўных паставак. Азербайджанская нафта, напрыклад, як і венесуэльская, будзе дастаўлена праз Украіну па нафтаправодзе Адэса - Броды.
Што да паставак праз парты на Балтыцы, то гэты напрамак можна палепшыць трубаправодным спосабам. Прэзідэнт нагадаў аб сур'ёзных намерах з боку ЗША. Размова якраз аб фінансавай дапамозе на будаўніцтва балтыйскай трубы.
А.Рыбакоў: Нафта ад невялікіх расійскіх кампаній створыць канкурэнтнае асяроддзе
Кіраўнік профільнага канцэрна пацвердзіў: глядзім у розныя бакі. Але пошук альтэрнатывы будзе ісці і на тым жа расійскім рынку. Пастаўкі нафты ад невялікіх кампаній дазволяць сысці ад манапалізму і негатыву, які з ім звязаны.
Нафтавае пытанне застаецца на кантролі. Менавіта таму ў такім складзе палітычнаму і эканамічнаму штабу трэба будзе сустракацца і надалей. Не ведаем, ці ўдалося перадаць рабочы дух гэтай нарады (менавіта такой яна і была), прайшліся па ўсіх праблемных момантах беларускай нафтавай галіны. Урад, вядома, не ў ружовых акулярах, але, думаю, словы Прэзідэнта гучалі выцверажальна. Жыццё чарговы раз паказвае, што ў энергетычных пытаннях варта разлічваць перш за ўсё на сябе.