Чакаецца, што з удзельнікамі сустрэнецца Прэзідэнт Аляксандр Лукашэнка. Гэта паведаміла прэс-сакратар Кіраўніка дзяржавы Наталля Эйсмант. Заўтра адбудзецца пасяджэнне міністраў абароны дзяржаў АДКБ. На парадку дня - 12 пытанняў. Сярод іх - план сумеснай падрыхтоўкі органаў кіравання, а таксама фарміравання сіл і сродкаў сістэмы калектыўнай бяспекі на наступны год. На чацвер запланавана пасяджэнне Камітэта сакратароў саветаў бяспекі.
Прадоўжыць - Наталля Брэвус. Можна сказаць, што гэты афіцыйны тыдзень у Мінску пройдзе пад знакам бяспекі. Адразу некалькі сустрэч - па лініі АДКБ. Гэта арганізацыя павінна выходзіць на новы ўзровень у сваёй дзейнасці - знаходзіць рэальную сілу. Аб гэтым неаднаразова заяўляла Беларусь. Ініцыятывы і прапановы нашай краіны заўсёды пазітыўна адбіваюцца на працы ўсяго блока.
Зрабіць так, каб арганізацыю не баяліся, але паважалі. Гэтую думку агучыў Прэзідэнт Беларусі яшчэ ўвосень на саміце АДКБ у Ерэване. Тады ўдзельнікі сустрэчы заяўлялі, што Арганізацыі не перашкодзіць аптымізацыя, сілавое ўмацаванне і "наладжванне" механізмаў крызіснага рэагавання. Наогул, АДКБ дзейнічае з 2002 года на аснове Дагавора, падпісанага яшчэ ў 92-ім. Тады прыйшлі да меркавання, што клапаціцца аб калектыўным спакоі прасцей.
Сёння ў блок уваходзяць шэсць дзяржаў - гэта Арменія, Беларусь, Казахстан, Кыргызстан, Расія і Таджыкістан. Гэта значыць, значная частка Еўразіі. Удзельнікі арганізацыі прадстаўляюць адразу тры рэгіёны - Еўропу, Каўказ і Цэнтральную Азію. І ў кожным з іх ёсць свае складанасці ў гарантаванні бяспекі.
Ужо заўтра звераць гадзіннікі міністры абароны краін АДКБ. На парадку дня - 12 пытанняў. Сярод іх - план сумеснай падрыхтоўкі органаў кіравання і фарміраванняў сіл і сродкаў сістэмы калектыўнай бяспекі на наступны год. Таксама абмяркуюць асноўныя прынцыпы ваенна-тэхнічнага супрацоўніцтва паміж дзяржавамі. Маюць намер вызначыцца і з планам кансультацый па знешняй палітыцы і абароне. На чацвер запланавана пасяджэнне Камітэта сакратароў саветаў бяспекі.
Той, хто сочыць за навінамі, заўважыў, што ўсё часцей сусветныя палітыкі закранаюць пытанні бяспекі. Ну а для Беларусі гэтай тэмай будзе працята і ўсё лета. Забеспячэнне рэгіянальнай стабільнасці і міру на еўразійскай прасторы будуць абмяркоўваць у рамках АДКБ, а ўжо праз месяц мінская пляцоўка стане месцам, дзе збяруцца парламентарыі АБСЕ. Размова пойдзе аб умацаванні даверу і супрацоўніцтва - і ўсё дзеля міру. Яно і зразумела. Бо калі ў краіне або ля яе меж неспакойна, то ўсе пытанні адыходзяць на другі план.
