Нам нельга дапусціць раз'яднання краін СНД. Трымацца адна адну заклікаў наш Прэзідэнт на саміце Садружнасці. Сёння яго прымае Кыргызстан на правах старшыні ў аб'яднанні. У Бішкек прыбылі лідары сямі дзяржаў. Апроч Аляксандра Лукашэнкі, гэта яшчэ кіраўнікі Азербайджана, Казахстана, Кыргызстана, Расіі, Таджыкістана, Туркменістана і Узбекістана.
Беларускі лідар выказаў пазіцыю нашай краіны па актуальных пытаннях узаемадзеяння ў рамках Садружнасці. Наш Прэзідэнт перакананы, што захаваць сувязі паміж нашымі дзяржавамі пасля развалу вялікай краіны было галоўнай мэтай СНД. І галаўным болем Захаду. Бо як раней, так і сёння апаненты не пакідаюць спроб аслабіць і падпарадкаваць сваім інтарэсам постсавецкія дзяржавы. Быць разам у цяперашні няпросты час - значыць, не ісці на повадзе ў калектыўнага Захаду.
Сёння ў свеце высокі запыт на аб'яднанні, якія ідуць па шляху ўмацавання супрацоўніцтва, мірнага суіснавання, ліківідацыі дыскрымінацый па розных прыкметах. І СНД адно з такіх. Таму сёння так цэніцца Садружнасць, упэўнены Аляксандр Лукашэнка. Да яе сёння прыглядаюцца і іншыя аб'яднанні. Беларусь вітае такую цікавасць. Наша краіна заўсёды была прыхільніцай спалучэння розных інтэграцый з сугучнымі мэтамі. Галоўнае - падтрымліваць адна адну, а не чыніць перашкоды. Расце значнасць ШАС і БРІКС. Цеснае супрацоўніцтва здольна ўмацаваць нашы пазіцыі. Гэта дазваляе моцна стаяць на нагах ва ўмовах сусветнай турбулентнасці і санкцыйнага націску.
На будучыню ўжо зроблена шмат. Садружнасць падтрымлівае мірныя інвестыцыі ў навуку, біятэхналогіі, штучны інтэлект, у той час калі Захад марнуе вялізныя рэсурсы на вайну. Так, не без праблем і ў нашым рэгіёне. Але ўсе складанасці трэба вырашаць разам. Наш Прэзідэнт запэўніў, што гарантам нашага ўстойлівага і бяспечнага развіцця будзем толькі мы самі. Трэба толькі забяспечыць самадастатковасць нашых эканомік. Для гэтага ўсё ёсць: і рэсурсы, і кампетэнцыі. Але неабходна палітычная воля лідараў і разуменне важнасці фармату Садружнасці.