Асноўная місія міжнародных назіральнікаў у Беларусі - даць аб'ектыўную ацэнку правядзенню выбараў. Аб гэтым заявіў кіраўнік штаба місіі назіральнікаў ад СНД Леанід Анфімаў у размове з намеснікам генпракурора краіны Максімам Вароніным.
Сустрэча адбылася напярэдадні адзінага дня галасавання, каб абмеркаваць пытанні, якія датычацца працы нагляднага ведамства падчас абрання дэпутатаў Палаты прадстаўнікоў Нацыянальнага сходу і мясцовых саветаў.
Са слоў Леаніда Анфімава, у Беларусі акрэдытаваныя і ўжо працуюць больш як 50 доўгатэрміновых назіральнікаў. Іх місія стартавала з 22 студзеня. Гэта 125-я місія назіральнікаў, якая працуе на прасторах СНД, і 12-я місія маніторынгу за электаральнымі кампаніямі ў Беларусі. Задача - дапамагчы правядзенню свабодных, дэмакратычных і празрыстых выбараў у нашай краіне.
Выбіраць дэпутатаў у Палату прадстаўнікоў Нацыянальнага сходу 8-га склікання і мясцовыя саветы 29-га склікання беларусы будуць у адзіны дзень галасавання - 25 лютага.
Зараз у Беларусі ў актыўнай фазе перыяд агітацыі, ён завершыцца за дзень да выбараў. Датэрміновае галасаванне пройдзе з 20 па 24 лютага ўключна.
