Шанхайская арганізацыя супрацоўніцтва мае намер удзельнічаць у маніторынгу прэзідэнцкіх выбараў у Беларусі. Да гэтага моманту Выбаркам зарэгістраваў ужо 33 міжнародныя назіральнікі ад краін - удзельнікаў СНД. Каля 40 доўгатэрміновых - ад місіі АБСЕ - чакаюць у Мінску к першаму верасню. Пра гэта сёння на сустрэчы з кіраўнікамі вядучых беларускіх масмедыя заявіла кіраўнік Цэнтрвыбаркама Лідзія Ярмошына.
Спецыялісты абмеркавалі стратэгію працы СМІ падчас правядзення галоўнай палітычнай кампаніі года ў краіне. Так, газеты і выданні, якія не ўключаныя ў спіс абавязаных размяшчаць перадвыбарныя праграмы кандыдатаў, маюць права ў гэтым адмовіць. Нагадаем, пастанова выбарчай камісіі абавязвае некаторыя буйныя друкаваныя СМІ публікаваць бясплатна перадвыбарныя праграмы кандыдатаў. Астатнія выданні могуць гэта рабіць на камерцыйнай аснове. І аплата для ўсіх кандыдатаў - аднолькавая.
Лідзія Ярмошына, старшыня Цэнтральнай камісіі Беларусі па выбарах і правядзенні рэспубліканскіх рэферэндумаў: "Усе астатнія газеты могуць падаваць сваю плошчу толькі на камерцыйнай аснове. Вядома, яны могуць і бясплатна, калі пажадаюць, але тады, вядома, усім патэнцыяльным кандыдатам. Але ў тым выпадку, калі СМІ, якія не ўваходзяць у пералік рэдакцый, якія абавязаныя апублікаваць праграму, адмовяць кандыдату, цалкам магчыма, яно адмовіць з той падставы, што наогул не збіраецца публікаваць палітычную рэкламу, альбо таму што ідэі, абвешчаныя гэтай праграмай, не адпавядаюць рэдакцыйнай палітыцы гэтага выдання. Такое права ў газеты ёсць, і гэта не з'яўляецца парушэннем".
Збор подпісаў у краіне працягваецца, ініцыятыўныя групы будуць працаваць да 21 жніўня ўключна. Пасля чаго пройдзе праверка подпісаў на сапраўднасць, і пачнецца працэс рэгістрацыі кандыдатаў у Прэзідэнты. Участкі для галасавання ўжо сфарміраваныя. У тым ліку за мяжой. Усяго іх больш за 6 000.
