Дэпутаты і члены Савета Рэспублікі звярнуліся да сусветнай супольнасці ў сувязі з сітуацыяй вакол Беларусі

Дэпутаты ўсіх узроўняў і члены Савета Рэспублікі Нацыянальнага сходу прынялі зварот да міжнароднай супольнасці ў сувязі з сітуацыяй вакол Беларусі.

"Як паўнамоцныя прадстаўнікі беларускага народа, - гаворыцца ў ім, - звяртаемся да сусветнай супольнасці з заклікам непрадузята ацаніць сітуацыю, што складваецца вакол нашый краіны, калі пад выглядам барацьбы за дэмакратычныя каштоўнасці па сутнасці маюць месца агрэсіўны ўсебаковы націск на суверэнную дзяржаву і яе грамадзян, грубае парушэнне базавых прынцыпаў міжнароднага права па неўмяшанні ва ўнутраныя справы дзяржаў. Такія дзеянні ствараюць рэальную пагрозу міжнароднаму міру і бяспецы, парушаюць агульнапрызнаныя палажэнні Статута ААН, адна з заснавальніц якой і наша краіна. Незалежнасць, развіццё чалавечага патэнцыялу, эканамічны рост і ўмацаванне Беларусі - відавочная аснова дабрабыту жыхароў нашай краіны і залог геапалітычнай стабільнасці ў вялізным рэгіёне, які звязвае Еўропу, Расію і Азію", - гаворыцца ў звароце.

Замест падтрымкі і развіцця ўзаемавыгаднага супрацоўніцтва шэраг дзяржаў актыўна спрыяе дэстабілізацыі сітуацыі ў Рэспубліцы Беларусь: супраць нас разгорнута масіраваная інфармацыйная агрэсія, накіраваная як на ўцягванне нашых грамадзян у дэструктыўную дзейнасць з мэтай учынення дзяржперавароту, так і на фарміраванне вельмі негатыўнага вобразу краіны на міжнароднай арэне. Уводзяцца беспрэцэдэнтныя і неабгрунтаваныя санкцыі. Не спыняецца, а толькі ўзмацняецца палітычны і эканамічны націск. Заяўленая мэта - садзейнічанне ўмацаванню дэмакратычных каштоўнасцяў і свабод. Аднак фактычны вынік зусім іншы - падрыў эканамічнага патэнцыялу нашай краіны і запаволенне развіцця. 

У звароце гучыць заклік да сусветнай супольнасці выступіць супраць неабгрунтаванай, контрпрадукцыйнай і дыскрымінацыйнай палітыкі ў дачыненні да Беларусі, праявіць салідарнасць з нашай краінай у адстойванні права на суверэнітэт і мірнае жыццё, вярнуцца да адказнага і канструктыўнага ўзаемадзеяння на карысць усіх краін і народаў.