Развіццё жывёлагадоўлі і выпуск прадукцыі, якая з поспехам заменіць імпартную, - прыярытэт, і над гэтым працуюць беларускія вытворцы. Так, пад Магілёвам адкрылася першая дзяржаўная казіная ферма. І з адраджэннем яшчэ адной галіны сельскай гаспадаркі адкрываюцца новыя перспектывы па выпуску гіпаалергеннай прадукцыі.
Лідары па вытворчасці малака ў свеце - козы зааненскай і альпійскай парод - дабраліся і да ўсходу Беларусі. На ўскраіне абласнога цэнтра працуе першая дзяржаўная казіная ферма.
Па сутнасці дзяржплемпрадпрыемства пайшло на эксперымент. Закупілі 150 коз, распрацавалі тэхналогію ўтрымання, кармавы стол. У выніку ўсяго за некалькі гадоў пагалоўе вырасла ў чатыры разы.
Сакрэт просты, расказвае кіраўнік прадпрыемства Мікалай Арлёнак. Над рэалізацыяй праекта працавалі лепшыя жывёлагадоўцы. Зараз тут распрацоўваюць новыя бізнес-планы, бо попыт на коз у свеце, ды і ў мясцовага насельніцтва і фермераў расце.
Кармы імкнуцца нарыхтаваць самі. І вядзецца пастаянны кантроль за здароўем жывёл, у тым ліку за біяхімічным складам крыві, бо на коне яшчэ і якасць малака. Штодня каза ў сярэднім дае па 3 кг. Паставілі для гэтага сучаснае абсталяванне. З'явіўся прыбытак.
Мікалай Арлёнак, гендырэктар Магілёўскага дзяржплемпрадпрыемства:
Літр казінага малака на сёння мы рэалізоўваем па 2,5 рубля. У параўнанні з каровіным малаком амаль у два разы даражэй. Плануем перапрацоўваць малако на прадпрыемствах Магілёўскай вобласці, каб і сыры вырабляць, і малако на разліў.
Хутка на прылаўках магазінаў рэгіёна з'явіцца новы прадукт. Першыя 250 кг казінага малака адпраўлены на Шклоўскі масларобны завод.
За якасцю вытворчасці на ўсіх этапах сочыць лабараторыя. З дзясятак даследаванняў праходзіць сыравіна, перш чым адправіцца ў доўгі шлях перапрацоўкі. Дарэчы, калі ідзе вытворчасць казінага малака, дзеляцца сакрэтам на заводзе, выпуск іншай прадукцыі тут прыпынены.
"Залаты фонд" пажыўных рэчываў і важных мікраэлементаў. Прадукт, які практычна не ўтрымлівае алергенаў. Вытворчасць казінага малака плануюць асвоіць і іншыя заводы. З улікам такога попыту на самой ферме таксама рыхтуюцца да вялікіх перамен. У планах - павялічыць пагалоўе ў шэсць разоў.
