Нагадаем, летась яе зрабілі пешаходнай па выхадных і святочных днях. Ствараць настрой дапаможа гандаль і вулічныя мастакі, музыканты, танцоры. Антаніна Станкевіч даведалася, чым здзівіць у гэтым сезоне мінчан і гасцей сталіцы пакуль што адзіная пешаходная вуліца.
Апошні прагон перад выхадам... не на сцэну. Танцаваць не перад публікай, а непасрэдна сярод гледачоў - бясцэнны вопыт. А таму магчымасць выступіць на Карла Маркса танцоры з тэатра танца архітэктурнага факультэта БНТУ не маглі прапусціць.
На 9 Мая рыхтуюць тэматычны нумар. Танец так і называецца: вайна. У наступныя дні рэпертуар папоўніцца іншымі пастаноўкамі. Танцаваць на Карла Маркса гэтыя хлопцы і дзяўчаты збіраюцца ўсё лета.
Як і летась, ствараць святочны настрой мінчанам і гасцям сталіцы будуць не толькі танцоры. Спевакі, музыканты, клоўны, мімы - жаданыя госці на сталічным праменадзе. Жадаючых несці сваю творчасць у масы - у прамым сэнсе гэтага слова - хоць адбаўляй, кажуць спецыялісты аддзела культуры.
З улікам мінулагодніх памылак і ў інтарэсах тых, хто на Карла Маркса не проста прыходзіць прагуляцца, а жыве, сёлета вырашылі адмовіцца ад шумных рок-груп.
Мінчане з нецярпеннем чакаюць сезона пешых прагулак. Хтосьці ўжо ведае, як яно было ў мінулым годзе, а хтосьці даведаўся толькі сёлета, і хоча на ўласныя вочы ўбачыць “Мінскі Хрышчацік”.
У дні, калі вуліца Карла Маркса будзе недаступнай для аўто, паркавацца можна будзе на вуліцы Свярдлова і Ульянаўскай у крайняй правай паласе. Сезон пешых прагулак скончыцца ў верасні.