Адно са старажытных месцаў Беларусі - горад Капыль Мінскай вобласці - ужо рыхтуецца да праваслаўнага Вялікадня. Тут ідзе будаўніцтва нядзельнай школы, распісваюцца сцены храма Узнясення Гасподняга
Які перадвелікодны падарунак зрабілі мінскія швачкі па залатым шыцці капыльскай царкве і куды адправіцца выстава расшытых золатам яек - расказала Ларыса Гулякевіч.
Купалы храма ў гонар Узнясення Гасподняга вось ужо паўтара стагоддзя ўзвышаюцца над горадам. Помнік архітэктуры размешчаны ў цэнтры старажытнага Капыля і з'яўляецца месцам духоўнай сілы і благаславення для мясцовых жыхароў.
Мастак - афарміцель храма Наталля Панасюк у Капыль прыехала 30 гадоў таму з Казахстана - горада Паўладара. Рэстаўруе і стварае іконы ў сваёй аўтарскай тэхніцы. Падчас афармлення літаграфій выкарыстоўвае розныя матэрыялы - фольгу, бісер, рознакаляровыя пацеры.
Менавіта сюды, у Капыль, на сваю малую радзіму Вольга Старасціна - майстар вязання ў тэхніцы "ірландскія карункі" - прывезла каштоўны падарунак - літургічны набор, зроблены з чырвонага аксаміту, вышыты залатымі ніткамі, стразамі і жэмчугам.
Вольга Старасціна як арганізатар і ідэйны натхняльнік міжнароднага праекта "Звяжам свет прыгажосцю" аб'ядноўвае майстрых з розных краін. Гэта і праект "Поры года", у якім чатыры ўборы - Вясна, Лета, Восень, Зіма - ствараліся аўтарамі з маленькіх фрагментаў. А яшчэ калядныя вязаныя ўпрыгажэнні і шары. На гэты раз Вольга звярнулася да спецыялістаў з Мінска па шыцці залатымі ніткамі, якія стварылі такі твор мастацтва.
Калекцыя сувенірных велікодных яек - яшчэ адзін міжнародны праект, які адправіцца ў суседні Нясвіж на экспазіцыю ў Радзівілаўскі замак.
Кожнае з трыццаці яек - твор мастацтва. Усе яны прывезены не толькі з розных гарадоў, але і з розных краін. Кожны шэдэўр зроблены ў рознай тэхніцы. Тут і пляценне бісерам, і ірландскія карункі, а некаторыя маюць нават сапраўдную залатую нітку.
Пасля благаславення на капыльскай зямлі сувенірную калекцыю каштоўных яек чакаюць асобныя апартаменты Радзівілаўскага палаца. У спецыяльнай зале вытанчанымі творамі мастацтва змогуць любавацца ўсе наведвальнікі замка.
