Беларускія спартсмены галасуюць датэрмінова
Выбаршчыкаў участка № 1 у Брэсце сёння чакаў сюрпрыз. Сярод тых, хто прыйшоў галасаваць датэрмінова, аказалася зорка спорту Таццяна Халадовіч - чэмпіёнка II Еўрапейскіх гульняў у кіданні кап’я і фіналістка Алімпійскіх гульняў, а таксама ўладальніца нацыянальнага рэкорду краіны. Нягледзячы на дастаткова шчыльны трэніровачны графік, аддаць свой голас вырашыла загадзя. Выканаць свой грамадзянскі абавязак, а заадно і ўвасобіць даўнюю мару. Аляксей Захарчук - адданы прыхільнік таленту Таццяны Халадовіч, не чакаў, што на выбарчым участку сустрэне свайго куміра. Але не разгубіўся і ўзяў аўтограф знакамітай спартсменкі.
Імкненне да першынства зматывавала датэрмінова скарыстацца правам голасу і чэмпіёна II Еўрапейскіх гульняў, спартыўнага акрабата Артура Белякова і бронзавага прызёра Алімпійскіх гульняў у Афінах па грэка-рымскай барацьбе Вячаслава Макаранку.
Датэрмінова галасуюць артысты беларускай сцэны
Рэпетыцыі, канцэрты, запісы новых песень. Нягледзячы на шчыльны гастрольны графік і сур'ёзную падрыхтоўку да сольніка, заслужаная артыстка Беларусі Іна Афанасьева свой голас аддала датэрмінова і заслужанаму, на яе думку, прэтэндэнту на дэпутацкі мандат.
Галоўны Дзед Мароз Беларусі з такой нагоды і зусім прыпыніў падрыхтоўку да Новага года і на дзень выйшаў з вобраза галоўнага навагодняга персанажа. Уладзімір Радзівілаў ужо два дзясяткі гадоў нязменны казачны чараўнік для дзяцей усёй краіны. І нягледзячы на тое, што да свайго выбару ён падышоў асэнсавана і адказна, усё ж у каментарыях ва ўласцівай яму форме пажартаваў, што на Дзеда Мароза спадзявайся, а сам не агінайся. Бо тое, як будзе жыць краіна ў найбліжэйшыя чатыры гады, залежыць не ад удару кія, а ад выбару кожнага выбаршчыка.
Датэрміновае галасаванне: самая высокая яўка ў Віцебскай вобласці
Дарэчы, у лідарах па колькасці датэрмінова запоўненых выбаршчыкамі бюлетэняў паўночны рэгіён. Тут выбар на карысць свайго кандыдата зрабілі больш за 21 % тых, хто галасуе. У цэлым свой выбар па ўсёй краіне ўжо зрабілі больш за 19 % беларусаў. Сёння адна са сталічных выбарчых урн папоўнілася голасам за і міністра адукацыі. На выбарчы ўчастак Ігар Карпенка прыйшоў разам з жонкай, сынам, нявесткай і ўнучкай.
За выбарамі сочаць 30 тысяч унутраных назіральнікаў і тысяча міжнародных
За празрыстасцю і сумленнасцю галасавання на ўчастках сочаць 30 тысяч нацыянальных назіральнікаў і яшчэ тысяча ад міжнародных арганізацый - СНД, ПАСЕ, БДІПЧ і АБСЕ. Адылхан Біжанаў прыляцеў з Казахстана некалькі гадзін таму. Першы пункт у сталіцы - 168-ы выбарчы ўчастак. Для госця гэтыя парламенцкія выбары ў Беларусі не першыя. Чатыры гады таму яго прыемна здзівіла высокая яўка, у тым ліку і ў дні датэрміновага галасавання.
Адзначым, усяго ў краіне працуюць амаль 6 тысяч выбарчых участкаў. Аддаць голас за аднаго з кандыдатаў датэрмінова можна і заўтра. Пункты для галасавання працуюць з 10:00 да 14:00 і з 16:00 да 19:00. У асноўны для галасавання дзень - гэта нядзеля - зрабіць свой выбар можна будзе з 8:00 да 20:00. Выбаршчыкам пры сабе неабходна мець пашпарт або любы іншы дакумент, які сведчыць асобу. А святочны настрой ужо па добрай традыцыі забяспечаць выязны гандаль і насычаная культурная праграма.
