Пытанне аб падрыхтоўцы будучых касманаўтаў узнімуць на 5-м Усебеларускім народным сходзе. Гэта сёння заявіў касманаўт Уладзімір Кавалёнак на адкрыцці павільёна "Космас" у мінскім аэраклубе на Баравой. Касмічныя тэхналогіі ў нашай краіне развіваюцца даўно. Некалькі гадоў таму Беларусь вывела на арбіту свой першы спадарожнік і зараз сумесна з расійскімі калегамі плануецца стварыць цэлую групоўку спадарожнікаў дыстанцыйнага зандзіравання Зямлі ў інтарэсах Саюзнай дзяржавы.
Расказвае Уладзімір Каралёў.
22 ліпеня 2012 года, касмадром Байканур - 400-кілаграмовы спадарожнік выходзіць на зямную арбіту. Упершыню ў гісторыі незалежнай Беларусі апарат айчыннай вытворчасці паднімаецца ў космас. Зрэшты, заваяванне Сусвету беларусамі пачалося яшчэ 43 гады таму. У снежні 1973 Пётр Клімук ажыццяўляе свой першы касмічны палёт. Скафандр касманаўта і спускальны апарат карабля "Саюз" - з гэтага дня рэчы, з дапамогай якіх пісалася касмічная гісторыя.
Касмічныя тэхналогіі ў Беларусі развіваюцца даўно. Невыпадкова разам з расійскімі калегамі зараз ствараецца групоўка спадарожнікаў дыстанцыйнага зандзіравання Зямлі ў інтарэсах Саюзнай дзяржавы. Прызначэнне такіх апаратаў вельмі шырокае: кантроль за прыроднымі рэсурсамі, маніторынг лясных пажараў і іншых надзвычайных сітуацый, абнаўленне тапаграфічных карт, праверка навакольнага асяроддзя, дакладная метэаралогія.
Адкрыццё павільёна "Космас" стала сюрпрызам і для наведвальнікаў - паветраныя баі, паказальныя выступленні авіяцыі, парашутыстаў і спецыялістаў па ваенна-прыкладным відзе спорту.
Мабыць, самае яркае відовішча для гледачоў - паказальнае выступленне беларускіх асаў. Лётчыкі на самалётах і верталётах выклікалі вялікую цікавасць у тых, хто сабраўся ў мінскім аэраклубе.
Пачынаў на Су-25, а падняўся вышэй за неба - выхадзец Чэрвеня Алег Навіцкі правёў у космасе паўгода. І сёння касманаўт-выпрабавальнік на такія палёты глядзіць з аптымізмам.
Касманаўты прынялі ўдзел і ў адкрыцці Алеі герояў 50-й змяшанай авіябазы, а таксама ў пасадцы дрэў. Памяць беларускіх першаадкрывальнікаў космасу за дзень увекавечылі адразу ў некалькіх месцах краіны.
