У Інстытуце мікрабіялогіі Акадэміі навук Беларусі зараз будуць працаваць 8 лабараторый, у якіх ёсць самае найноўшае абсталяванне для генна-інжынерных і малекулярна-біялагічных даследаванняў.
Сюжэт Улады Карніцкай. Цяжка паверыць, але нядаўна тут была паліграфія, крыху пазней - вытворчасць макаронаў. Зараз жа - цалкам новы цэнтр біятэхналогій. У Беларусі падобных няма. Раней некаторыя даследаванні нашы навукоўцы праводзілі ў расійскіх інстытутах. Зараз жа ў Беларусі калегі могуць працаваць над найскладанейшымі распрацоўкамі.
Па сутнасці, усе генна-інжынерныя работы пачынаюцца з вылучэння ДНК. Гэтае абсталяванне, якога, дарэчы, раней у інстытуце не было, і ў краіне ў цэлым іх усяго некалькі, можа вылучыць ДНК з любога раствору. І больш за тое, паказаць яго дакладную канцэнтрацыю. І каштуе такі апарат каля 10 000 еўра.
Асноўныя кірункі распрацовак 140 навукоўцаў, а менавіта столькі супрацоўнікаў тут будзе працаваць, - стварэнне імплантатаў, біяпаліва новага пакалення і супрацьпухлінных прэпаратаў. Але, мабыць, адна з першарадных задач, прызнаюцца навукоўцы, - замяніць усю хімію ў таблетках і суспензіях на біярэчывы. Гэта значыць, зрабіць прэпараты, напрыклад, некаторыя моцныя антыбіётыкі, найменш таксічнымі.
Ужо зусім хутка навукоўцы прэзентуюць свае новыя распрацоўкі: спецыяльную вакцыну для стымуляцыі імунітэту і безлактознае малако для тых, у каго алергія. Не выключана, што пазней іх пачнуць прадаваць у тым ліку і за мяжу. Напрыклад, супрацьпухлінныя прэпараты, створаныя ў нашым інстытуце мікрабіялогіі, ужо імпартуюцца ў дзясяткі краін.
Паводле папярэдніх падлікаў, цэнтр за год зможа выпускаць прадукцыю (ад лекаў да рэагентаў) мінімум на дзевяць мільярдаў долараў. Зараз жа ў планах навукоўцаў будаўніцтва ўласнай вытворчасці ў асобным корпусе. Там ужо зусім хутка пачнецца рамонт.
