Заходнія тэндэнцыі кідаюць выклік маральнай стабільнасці і духоўным апорам чалавека. У гэтай сітуацыі як ніколі важна аб'яднацца і абараніць традыцыйныя, правераныя стагоддзямі каштоўнасці нашага народа. Гэтыя і іншыя пасылы прагучалі на калегіі ўпаўнаважанага па справах рэлігій і нацыянальнасцяў Беларусі. Мерапрыемства адбылося ў Барысаве, і выбар райцэнтра ў якасці пляцоўкі не выпадковы. Менавіта Барысаўскі раён мае лепшыя ва ўсім цэнтральным рэгіёне прыклады ўзаемадзеяння паміж дзяржаўнай уладай і царквой у справе выхавання моладзі. На барысаўскай сустрэчы былі прадстаўлены напрацоўкі адукацыйных, сацыяльных і рэлігійных устаноў. Унікальны праект прэзентавала Барысаўская епархія: яна прапанавала знаёміць юных з прыкладамі жыцця і духоўнага подзвігу праваслаўных святароў Барысаўшчыны, якія гістарычна пацярпелі за веру.
Асаблівая тэма, якая актуальна прагучала на сустрэчы, - падтрымка мацярынства і дзяцінства і процідзеянне абортам. Свае праекты ў гэтым кірунку прапанаваў Барысаўскі радзільны дом ва ўзаемадзеянні з Барысаўскай епархіяй.
