Намеснік начальніка ўпраўлення камунальнай гаспадаркі і энергетыкі - начальнік аддзела энергетыкі і надзвычайных сітуацый Міністэрства жыллёва-камунальнай гаспадаркі Аляксей Філановіч расказаў, у якіх раёнах Беларусі ўжо пачалі адключаць ацяпленне, піша БЕЛТА.
Рашэнні аб тэрмінах завяршэння абагравальнага сезона прымаюцца абласнымі, раённымі і гарадскімі выканаўчымі камітэтамі на падставе звестак аб сярэднясутачных тэмпературах па абласцях, а таксама прагнозаў Белгідрамета. Яны могуць быць прынятыя ў выпадку, калі сярэдняя тэмпература на працягу трох сутак знаходзіцца вышэй за 8-10 градусаў цяпла.
Ужо зараз рашэнні аб паэтапным завяршэнні абагравальнага сезона прынялі ў частцы рэгіёнаў краіны. "У асноўным гэта Гомельская вобласць. Некалькі гарадоў і раёнаў адключылі ацяпленне ў адміністрацыйных і прамысловых будынках. Ацяпленне ў жыллі адключылі ў Жлобінскім, Мазырскім і Рагачоўскім раёнах. У Ганцавіцкім раёне Брэсцкай вобласці таксама прынята рашэнне аб адключэнні цяпла ў жыллёвым фондзе. У Магілёўскай і Гродзенскай абласцях пакуль што прынялі рашэнні толькі аб адключэнні адміністрацыйных будынкаў, па жылфондзе пакуль не плануецца", - расказаў Аляксей Філановіч.
Адключаць цяпло пакуль не плануюць у Мінскай і Віцебскай абласцях. "Цэнтральны і паўночны рэгіёны яшчэ не прынялі такіх рашэнняў", - падкрэсліў ён.
