Беларускі скульптар Генадзь Буралкін памёр 2 студзеня 2024 года на 82-м годзе жыцця, паведамляе БЕЛТА.
Беларускі саюз мастакоў выказвае глыбокія спачуванні родным і блізкім мастака. Пра час і месца пахавання будзе аб'яўлена пазней.
Генадзь Буралкін з 1990 па 2001 год быў старшынёй Беларускага саюза мастакоў. У 1997 годзе ён атрымаў медаль Францыска Скарыны.
Яркі, неардынарны майстар, ён быў аўтарам многіх манументальных, станковых і графічных твораў. З 1976 года прымаў удзел ва ўсерасійскіх і міжнародных выставах. У сваіх работах выкарыстоўваў розныя матэрыялы - дрэва, камень, бронзу. Асноўныя тэмы твораў узятыя з народнага жыцця ў спалучэнні з гісторыяй і нацыянальнымі традыцыямі. Работы мастака характарызуюцца манументальнасцю, філасофскімі вобразамі, вытанчанасцю форм.
Сярод асноўных работ - помнік славы шахцёраў у Салігорску (1976), памятны знак у гонар 850-годдзя Гродна (1978), скульптурныя серыі "Скачок" (1998-2000), "Жыцень" (2000), "Берагіня" (2001-2002), "Абліччы камянёў" (2002) і іншыя.
Генадзь Буралкін займаўся афармленнем інтэр'ераў драматычнага тэатра (у суаўтарстве) і Дома грамадзянскіх абрадаў у Гродне. Сумесна са скульптарам А. Фінскім мастак стварыў выдатныя скульптурныя кампазіцыі, якія ўпрыгожваюць Нацыянальны акадэмічны Вялікі тэатр оперы і балета Беларусі (архітэктурная задума І. Лангбарда, рэалізаваная праз сем дзесяцігоддзяў).
Работы Буралкіна знаходзяцца ў фондах Беларускага саюза мастакоў, музеях Беларусі і іншых краін, прыватных калекцыях.
