Малады, але ён ужо многае паказаў. Тэлеканал "Беларусь 5" пачаў вяшчанне ў канцы 2013 года. У мінулым трыумфальная для нас Алімпіяда ў Сочы, хатні чэмпіянат свету па хакеі і мноства іншых стартаў рэспубліканскага і міжнароднага маштабу. За два з лішнім гады "Беларусь 5" стаў нацыянальным спартыўным брэндам, і гэта толькі пачатак.
Пра мінулае, сучаснасць і будучыню тэлеканала раскажа Павел Капуцкі. Інфармацыйнае вяшчанне з сучаснай студыі - адно з апошніх дасягненняў спартыўнага тэлеканала. Навіны глядач атрымлівае ў прамым эфіры.
Але ўсё ж галоўнае - гэта тэлетрансляцыі. Мінулай восенню матч БАТЭ - "Барселона" ўбачылі балельшчыкі з больш як паўсотні краін.
Калі ў Беларусі праходзіць што-небудзь сур'ёзнае, на месцы падзей абавязкова з'яўляюцца вялікія машыны з сімволікай Белтэлерадыёкампаніі. Перасоўная тэлевізійная станцыя "Александрына" з'яўляецца лепшай у краіне. Яна дазваляе ствараць карцінку hd-якасці. Паглядзім, што ўнутры.
Рэжысёрская брыгада Аляксея Супонева і Ірыны Цімохінай - адна з самых вопытных. Моладзі ёсць чаму павучыцца ў людзей, якія не першы дзясятак гадоў ствараюць тэлекарцінку, якую мы прывыклі бачыць.
Ірына Цімохіна, рэжысёр тэлебачання галоўнай дырэкцыі тэлеканала "Беларусь 5": "Асноўная гэтая праграмная лінейка. І ўсё, што рэжысёр, як піяніст, набірае на гэтай праграмнай лінейцы, усё гэта наш тэлеглядач бачыць у экране. Задача спартыўнага рэжысёра - гэта пасадзіць балельшчыка на трыбуну так, быццам ён сядзіць на лепшых месцах".
Калі спартыўная дырэкцыя Белтэлерадыёкампаніі перарасла ў самастойны тэлеканал, магчымасцяў стала больш. Павялічыўся і аб'ём працы, але супрацоўнікі "Б-5" не тыя пчолы, што баяцца мёду.
"Спорт-кадр" - праект Агенцтва тэленавін. Праграма выходзіць на "Беларусь 5" у аўторкі.
Мікалай Стула, кіраўнік аддзела спартыўнай інфармацыі АТН: "Карэспандэнты АТН ствараюць дакументальнае кіно пра нашых славутых спартсменаў. Такіх як Карстэн, Мядзведзь, Мірановіч. Я спадзяюся, гэтыя праекты таксама ўпрыгожваюць эфір "Беларусь 5".
Праграмы пра футбол, баскетбол, гісторыю спорту. Трансляцыі чэмпіянатаў Беларусі па футболе і хакеі, Англійская прэм'ер-ліга, НБА, тэніс. Чэмпіянаты свету і Еўропы па розных відах спорту. Улетку ў першага ў краіне спартыўнага канала новыя выпрабаванні. У чэрвені - футбольны Еўра, у жніўні - Алімпіяда ў Рыа-дэ-Жанейра. Дзякуючы пятай кнопцы Вы нічога не прапусціце.
