Праваслаўная святыня - каўчэг з мошчамі святога князя Аляксандра Неўскага - падарожнічае па Беларусі. Спачатку былі Віцебск, Полацк, Ліда, а напярэдадні куфар даставілі ў цэнтральны рэгіён. Першым горадам, які прымае святыя мошчы, стаў Маладзечна. На тры дні - з 8 па 10 ліпеня - каўчэг будзе даступны для пакланення вернікаў у кафедральным саборы Маладзечанскай епархіі ў храме Успення Прасвятой Багародзіцы. Як віталі святыню ў першыя хвіліны яе прыбыцця, раскажа Наталля Бардзілоўская.
Пад пералівы званоў і вітальныя ўсмешкі прыхаджан у храм прывезлі пазалочаны куфар са святымі астанкамі, ён пераадолеў 135 кіламетраў з Ліды ў Маладзечна. Своеасаблівая духоўная эстафета: мясцовыя святары ўрачыста прымаюць рэліквію і дастаўляюць яе ў храм, у цэнтр, на аналой. У гонар прыбыцця каўчэга праходзіць святая літургія.
Пасля набажэнства адкрыты доступ да пакланення святыні і прыкладання да яе з малітвамі. Вернікі падыходзяць да сімвалічнага куфра з просьбамі і жаданнямі.
Аляксандр Неўскі быў пахаваны ва Уладзіміры, у манастыры. Сёння рака з яго мошчамі знаходзіцца ў Санкт-Пецярбургу, у Эрмітажы. У гонар святога князя названыя вуліцы і плошчы. У многіх гарадах яму пастаўлены помнікі.
Руская праваслаўная царква кананізавала нашчадка Юрыя Далгарукага і Уладзіміра Манамаха ў 1547 годзе. Князь наўгародскі, а потым і ўладзімірскі, кіеўскі, Аляксандр Неўскі - фігура больш чым палітык і палкаводзец, які перамог шведаў у Неўскай бітве і крыжаносцаў у Лядовым пабоішчы. Ён - патрыёт, сімвал служэння Айчыне, вернасці сваёй Радзіме ў самы цяжкі для яе перыяд. У часы Аляксандра Неўскага старажытная Русь была раздробленай, цярпела ад ворагаў з усіх напрамкаў. Князю ўдалося пераадолець адных, а з другімі навесці дыпламатыю. Урэшце, гэта яго крылаты выраз: "Хто да нас з мячом прыйдзе, ад мяча і загіне!"
Прыбыццё святых мошчаў у Маладзечна, як увогуле ў Беларусь, - знакавая падзея. Яна звязана з 800-годдзем з дня нараджэння самага знакамітага князя старажытнай Русі. А яшчэ гэта заклік з сівой даўніны да сучасных беларусаў аб’яднацца і быць мужнымі.
У Беларусі каўчэг прабудзе да 2 жніўня. Пасля Маладзечна яго чакаюць у Навагрудку. Пакланіцца святым мошчам змогуць у пятнаццаці гарадах нашай краіны. 30 ліпеня рэліквія прыбудзе ў Мінск.
